Tơlơi lăi pơthâo glăi mơ̆ng Gong gai dêh čar lăi rơđah: Thun 2023, prăk mă yua ngăn drăp kơnuk kơna yap him lăng 2 rơbâo 109 klai prăk. Bruă git gai mă yua ngăn drăp kơnuk kơna dưi ngă tui gơgrong hlâo, kơjăp phik tui tơlơi pơkă hlâo, pơhlôm djơ̆ hơdră bruă, hơdră pơkă, pơkrem khut khăt prăk mă yua, hrŏ trun bruă mă yua prăk lơm akă kiăng đơi, kaih pok pơhai. Abih bang prăk pơkrem mă yua, ngăn rơnoh kơnuk kơna thun 2023 lĕ 83 klai prăk.

Ăt amăng hrơi anai mơn (15/5), Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ bruă prăp lui Tal jơnum lok 7 hăng klah čun Tal jơnum ƀu hmâo pơkă hlâo tal 7; Gum pơhiăp kơ tơlơi lăi pơthâo glăi bôh tơhnal lăng tui bruă pơsir, lăi glăi tơlơi rơkâo đĭ mơ̆ng mơnuih pơ ala kơ mơnuih ƀôn sang mơ-ĭt truh Tal jơnum lok 6, Khua pơ ala mơnuih ƀôn sang dêh čar ta tal 15; pel ĕp lăi pơthâo glăi bruă mơnuih ƀôn sang rơkâo đĭ mơ̆ng Khua pơ ala mơnuih ƀôn sang dêh čar ta blan 4 thun anai./.