Tal anai, jơnum lok tal 8, Jơnum ngui bruă kơphê tơring čar hơmâo pơƀuh rơđah găn rơgao bruă mă slogan anăn “Anih kơphê rŏng lŏn tơnah rai jưh”, kiăng lăi bruă anai pơhưč kơtang, mơnâo bâo bơngưi kơphê hăng pơdah thâo gru grua hiam mơ̆ng khul ngă bruă kơphê.

Yang hrơi phrâo ƀlĕ, ơi Hồ Sỹ Trung, pô hmua đang V-Ori să Ea Yông, tơring glông Krông Pač, tơring čar Dak Lak hơmâo nao čuă đang kơphê ñu dŏ mơsah ia ling ia ngôm mơguah sing bring. Dŏ lăng tong ten amung bơnga than kơphê kô̆ či uai tui, ơi Trung pơsit brơi pok măi bruih ia, mah đang kơphê ñu ƀu kơƀah ia ôh. Ơi Trung brơi thâo, anai lĕ hơdră ngă tui mơneč phrâo kiăng pơgăn kơphê ƀu brơi bơnga čuh ƀudah blang tañ ôh, kiăng abih amăng đang ñu čuh blang sa amăng plĕ tơbŭk kô̆ bă hră amăng đang laih anun phuang ƀâo mơnâo bơnga kơphê mơtah, brơi tuai mut nao lăng čơkă bơyan ngui ngor bruă kơphê Ƀuôn Ma Thuôt tal 8:

“Ƀing gơmơi hlăk prăp lui rĭm hrơi, pioh ngă hrom hăng plơi pla, tơring glông laih anun hrom hăng mơnuih ƀôn sang čơkă tuai rơnguai mut rai ĕp lăng. Sa tơlơi kiăng lĕ brơi kơphê čuh blang bơnga ha amăng plĕ djơ̆ hrơi pok jơnum ngui mơtam mơ̆ng lơ 10-14/3.Tơdah ta tơguan hrơi bơnga kơphê čuh blang hrơi anai, ta bruih ia kiăng kơ hơmâo lu than ñu rông pioh bơnga tơl hrơi ta brơi pơđiă kơtang pơdơi bruih ñu blang bơnga puh kô̆ bă hră hăng mơnâo ƀâo bơngưi hiam biă mă. Čơkă tuai djop anih rai lăng jơnum ngui bruă kơphê Ƀuôn Ma Thuôt hăng rai ngui pơ Krông Pač”.

Blan 3 ƀơi Dak Lak lĕ bơyan ngă yang pơdơi pơdă ngui ngor, ăt jing bơyan bơnga kơphê čuh blang hyơ hyor djop anih. Samơ̆ djuai bơnga kô̆ čuh đĭ pơjing rai anăn hmư̆ hing mơ̆ng Dak Lak brơi čuh blang sa amăng plĕ. Lơ̆m sa blah đang kơnong čuh blang amăng dua wơ̆t sa thun hăng sa wơ̆t čuh blang amăng 3 hrơi. Yua kơ anun, lu pô đang hmua “farm kơphê” ƀơi tơring čar pơmin mă, ngă hiư̆m pă pơkong lui brơi kơphê čuh blang bơnga djơ̆ hrơi pơkă djă pioh mơnâo ƀâo bơngưi hiam amăng lu blan. Bơ ƀing tuai, lu mơnuih ruah mă bruă nao pơ Ƀuôn Ma Thuôt hlâo kơ mông jơnum ngui bruă kơphê arăng pơphun, kiăng hmao hyu ĕp lăng đang bơnga kơphê laih anun mơñum ia trà.

Yă Mai Thị Thu Thủy, tuai mơ̆ng tơring čar Ninh Bình nao pơ Ƀuôn Ma Thuôt mơ̆ng rơnuč blan 2, anun yơh ñu hyu ĕp lăng hăng thâo ƀâo mơnâo kơphê hiam amăng lu đang hmua laih anun mơñum ia trà phrâo mơ̆ng bơnga kơphê, tal blung a ñu mơñum djơ̆. Yă Thủy lăi:

“Tơdơi kơ hyu ĕp lăng đang kơphê hlăk čuh blang bơnga, čơphil rup hăng than, phun kơphê dŏ bơnga, laih anun mơñum ia trà bơnga kơphê djơh hăng anai mơak pran jua biă mă. Kâo pơmin ƀing đah kơmơi hrơi ƀing gơmơi hor biă mă mơñum ia trà anai”.

Jơnum ngui bruă kơphê Ƀuôn Ma Thuôt tal 8 thun 2023 pok pơhai amăng tlam mơmŏt hrơi anai, sa tơlơi jơnum ngui phrâo hloh. Anun lĕ ƀu djơ̆ kơnong boh yôm phun hơdră jơnum pơdah brơi kơ abih bang lăng, ƀudah ƀing khua mua pơphun bruă ruah mă ôh, jing sa tơlơi ñu kiăng hơmâo ba lu tuai jar kmar djru pơgôp hrom mơak pơdah rai gru grua hiam mơ̆ng dêh čar pô brơi abih bang lăng, ba gru grua hiam djuai kơphê hăng hơdră pơkra ming ia kơphê gơñu hrom hăng Việt Nam, tuai mơ̆ng djop čar amăng rŏng lŏn tơnah pơthâo hrom tơlơi mơak.

Jơnum ngui bruă kơphê Ƀuôn Ma Thuôt tal anai ƀuh phrâo lĕ, yua lu hơdră mơ̆ng djop tơring čar, anih hơmâo hmua đang boh sầu riêng, boh ƀrô, boh jrang yuan, boh kruăi dŭng, boh kruăi anet prong mơmih ăt hlăk amăng bơyan čuh blang bơnga mơ̆n, ƀâo bơngưi phuang mơtam. Ƀơi rĭm boh tơring čar, plơi pla mơnuih ƀôn sang ƀơi Dak Lak lêng kơ thâo krăn tong ten pô jing mơnuih pơphun kơ tơlơi jơnum ngui bruă kơphê Ƀuôn Ma Thuôt, sa čô mơnuih amăng plơi arăng phrâo pơsit lĕ plơi pioh tuai čuă ngui lăi:

“Bơyan jơnum ngui bruă kơphê anai ñu pơdjơ̆ nao ƀu kơnong kơphê ôh jing gru grua hiam mơ̆ng djuai ania Êđê ƀơi Ƀuôn Ma Thuôt anun yơh plơi pla gơmơi mơak biă mă hăng hik hăk dŏ tơguan hrơi mơak anai. Kâo ƀuh amăng plơi pla hok kơdok hloh, hlăk ngă bruă tañ pơgiong hĭ bruă prăp lui laih anun bơwih brơi kơ bơyan Festival kơphê anai. Plơi pla ala ƀôn pơphun bruă ngui ngor atông čing ring hơgor, hơtŭk riă tơnă hơbai bơwih brơi kơ tuai ƀong huă, blơi mă mơnong ƀong huă, samơ̆ mơñum kơphê soh sel ƀu apah prăk ôh. Amăng plơi hơmâo sang anŏ adoh ei rei, suang Tang Bi jing anăn sang anŏ Ei Rei, Tăng Bi mơtam wơ̆t sang anih sĭ ia kơphê Arul, kơphê Akŏ Dhông gơñu hlăk prăp lui gum hrom kơ mông Festival anai soh”.

Rơbêh 100 thun akŏ pơjing hăng pơđĭ kyar ƀơi kual lŏn Dap Kơdư, hrom hăng rơnoh bơwih ƀong prong, kơphê pơjing rai ia ƀlit kơ gru grua hiam, lir hơbit gru grua anun mơ̆ng giăm 50 djuai ania rai mơ̆ng 3 kual amăng dêh čar, găn rơgao ĕp lăng mơ̆ng mông ngă yang gru grua đưm pơhrôp glăi, pơphun pơlông mơñam mra laih anun gru grua ba rai mơ̆ng djuai ania kual yŭ kơdư dêh čar, kual ngŏ kơdư dêh čar truh pơ tơlơi ngui ngor gru grua quan họ Bắc Ninh, truh pơ mông jơnum ngui bruă kơphê hăng Jơnum ngui bruă Sầu riêng.

Jơnum ngui bruă kơphê Ƀuôn Ma Thuôt tal 8 anai, mơ̆ng lơ 10-14/3, amra ba glăi kơ phung tuai rơnguai sa tơlơi akhan đưm dlông ƀu thâo đut ră ruai kơ asar kơphê ƀâo bơngưi hiam hăng hơdôm pơjeh djuai phun pla hơgĕt thơ pơjing rai tơlơi mơak kơ djop djuai ania dŏ amăng kual lŏn hing ang hiam klă anai.