Lơ 21/2, ƀơi ƀôn prong Hồ Chí Minh, Jơnum min mơnuih ƀôn sang tơring čar Dak Lak pơphun jơnum hăng ƀing čih tơlơi pơhing lăi pơthâo Jơnum ngui kơphê Buôn Ma Thuột tal 9 thun 2025, hăng anăn “Buôn Ma Thuột-Anih tui nao mơng kơphê rŏng lŏn tơnah”. Pơphun sui 5 hrơi, dong mơng lơ 9-13/3, Jơnum ngui kơphê Buôn Ma Thuột tal 9 thun 2025 hơmâo lu anŏ pơplih phrâo pơhmu hăng hơdôm tal pơphun hlâo anun, him lăng pơhưč rơbêh 200 rơbâo tuai čuă ngui. Lu bruă mă mơng jơnum ngui čang rơmang lĕ anŏ pơtrut phrâo kiăng pơđĭ kyar tơring čar Dak Lak. Găn rơgao 8 wŏt pơphun, jơnum ngui kơphê Buôn Ma Thuột jing tơlơi ngui ngor yôm mơng gơnong bruă kơphê Việt Nam, bơdjơ̆ nao prong, kiăng kơđŏm glăi tơlơi hiam klă hăng mơnuih ƀôn sang, tuai čuă ngui amăng lŏn ia hăng tač rơngiao. Jơnum ngui tal anai ăt lĕ sa amăng hơdôm bruă ngă sit nik pioh hơdor glăi 50 thun hrơi blah dưi Buôn Ma Thuột, pơklaih rơngai tơring čar Dak Lak (10/3/1975-10/3/2025).

Jơnum ngui kơphê thun anai amra hơmâo 17 tơlơi ngui ngor phun anun lĕ: Jơnum ngui sang čơ pơdă prưng kơphê hăng gơnam OCOP; tal pơplông hơnia kơphê jơman; jơnum sĭ mơdrô jar kmar-tô nao rai, hrưn đĭ kơphê Việt Nam; mơñum kơphê soh sel ƀơi hơdôm sang sĭ mơdrô kơphê amăng đơ đam tơring čar; tal pơplông čeo song nan tơring glông Lăk; Jơnum ngui rơman Buôn Đôn….

Ơi Trần Hồng Tiến-Khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak brơi thâo, hiam lăng jơnum ngui kơphê thun anai amra pơhưč rơbêh 200 rơbâo tuai čuă ngui. Rơngiao kơ bruă nao pel ĕp lăng kơphê, tuai čuă ngui nao Jơnum ngui ăt mut hrŏm hăng ngui gru grua mơng ƀôn lan.