Jơnum hơmâo pơphun tơdơi kơ Kơnuk kơna ba tơbiă jơlan hơdră bruă mă rơwang thun 2022-2026 ngă tui tơlơi črâo trun mrô 15 mơng Khul git gai Ping gah kơ bruă pơtom hiăp bơwih ƀong djru pơđĭ kyar lŏn ia truh thun 2030. Đĭ pơhiăp amăng mông jơnum, Khua dêh čar lăi pơtong, kơtưn bruă pơtom hiăp bơwih ƀong lĕ tơlơi črâo trun prong mơng Ping gah hăng Kơnuk kơna ta amăng rơwang pơtrut kơtang tuh tia pơkra pơjing, pơplih phrâo lŏn ia.

Jơlan hơdră bruă mă mơng Kơnuk kơna pơsit tong jơlan gah “Tơlơi pơčeh phrâo, bruă mă khut khăt, hơdeč hmar, tŭ yua, tŭ mă hăng hluai tui hơdôm tơlơi gah kiăng pơđĭ kyar lŏn ia” hăng ba tơbiă 7 grup bruă jao akŏ phun kơ bruă pơtom hiăp bơwih ƀong mơng anai truh thun 2026. Khua dêh čar git gai Jơnum đing nao lăng glăi tong ten, hluai tui hơdôm tơlơi gal kiăng pok prong sĭ mơdrô pơ tač rơngiao, tuh pơ alin, tuai čuă ngui, boh thâo phrâo, tŭ mă hơdôm tơlơi pơtrut pơđĭ kyar phrâo. Mơng anun, ba tơbiă hơdôm hơdră  tŭ yua Jơlan hơdră bruă mă mơng Kơnuk kơna, hăng pran jua pơjing tơlơi tơnap jing tơlơi dưi; pơsit tong hơdôm bruă kiăng pơsir hĭ mơtăm, pok pơhai tañ; hơdôm jơlan gah, bruă jao gap ƀrô hăng sui pơ anăp.