Đĭ pơhiăp amăng mông jơnum, Khua dêh čar ơi Phạm Minh Chính brơi thâo jơnum kiăng lăng glăi bruă sĭ mơdrô lŏn mơnai, hơdôm tơlơi tơnap tap, gun găn; ba tơbiă hơdôm hơdră hăng bruă lŏn mơnai kah hăng hơdôm bruă bơdjơ̆ nao kiăng pơtrut bruă sĭ mơdrô lŏn mơnai tŏ tui pơđĭ kyar klă, hơđong kjăp.

Khua dêh čar rơkâo ƀing khua mua nao jơnum bơkơtuai lăng glăi tơpă sit, lăp djơ̆ tơlơi sit nik, sem lăng tong ten hơdôm tơlơi ba truh, sit biă ñu yua pran aka ƀu gơgrong; mơng anun ba tơbiă hơnong pơkă, bruă jao, hơdră pơđĭ kyar sĭ mơdrô lŏn mơnai lăp djơ̆ hăng tơlơi črâo trun, hơdră bruă, tơlơi phiăn mơng Ping gah, Kơnuk kơna, tui tơlơi bơwih ƀong sĭ mơdrô, tui jơlan xã hội chủ nghĩa. Tui Khua dêh čar, tơdơi kơ jơnum anai, Kơnuk kơna amra ba tơbiă tơlơi pơtrun mơng Kơnuk kơna kơ bruă sĭ mơdrô lŏn mơnai. Mơng anun, ngă akŏ phun kiăng pơtrut sĭ mơdrô lŏn mơnai brơi klă, hơđong kjăp, hluai tui tơlơi dưi kơplah wah Kơnuk kơna, mơnuih ƀon sang, anom bơwih ƀong sĭ mơdrô, tơlơi dưi bơkơnar, bưp tơnap tap gir pơsir hrŏm.