Hơdôm tơlơi gun amăng bruă ngă hrŏm, pơklaih ala lŏn hăng ngă hră pơar tuh pơ alin khom pơsir tañ giong pioh pơhlom brơi bruă pok pơhai ngă tui.

Tui hăng anom bruă hơmâo tơlơi dưi tơring čar Khánh Hòa, lu kơčăo bruă anet prong, kơčăo bruă phun ƀơi tơring čar dŏ kaih mă bruă, kơđông hĭ mơ̆ng bruă jao glăi ling pơkă, anih man pơdong, jŭ yap glăi lŏn mơnai, pơtong glăi phun tơdŭ mơ̆ng lŏn tơnah anih ba yua. Tơdơi kơ sem glăi hơdôm kơčăo bruă kaih đơi pok pơhai, ơi Nguyễn Việt Hùng, Khua Jơnum min mơnuih ƀôn sang tơring čar Khánh Hòa brơi thâo, tơring čar amra ngă tui khut khăt hloh amăng bruă pơphun hăng pok pơhai ngă tui, boh nik ñu ƀư̆ pơkra glăi bruă ngă hrŏm plah wah hơdôm sang bruă, pô sang bruă tuh pơ alin, kiăng bĕ hĭ tơlơi ngă, kơnong čih anăn rơkâo tŭ mă kơčăo bruă laih anun pioh lui hnun đôč.