Hơdră sem lăng hơdrôm hră čih anăn tơlơi hrăm ƀing čơđai gưl dua pioh pơmut hrăm anih 10 jing gưl klâo hăng djop sang hră kơnuk kơna ngă pô đơ đam tơring čar. Bơ sang hră Chuyên, hrăm ten sa hnŏng bruă lĕ khom ngă tui hơdră pơplông yap puang dưi mut hrăm anih 10. Thun hrăm anai tơring čar Lâm Đồng hơmâo rơbêh 54.800 čô čơđai sang hră hrăm anih 9; rơnoh pơkă iâu mut hrăm anih 10 djop sang hră kơnuk kơna tơring čar giăm 45.000 čô.

Amăng anun, sang hră gưl klâo sem hră pơar puang tơlơi hrăm lĕ 42.000 čô; 4 boh sang hră hrăm ten sa hnơ̆ng pơphun pơplông iâu pơmut 13.000 čô čơđai sang hră hăng hơdôm sang hră đôm lăm, kơnuk kơna čem rông čơđai sang hră mơnuih djuai ƀiă, ăt sem lăng puang hrăm 1000 čô čơđai sang hră. Hơdră sem puang anai tui hluai plơi pla anih dŏ. Ƀơi kual giăm guai hơdôm să, phường, čơđai sang hră kơnong čih anăn rơkâo mut hrăm ƀơi sang hră giăm plơi pla hloh. Hrơi blan pơkă kơ bruă čih anăn mut hrăm anih 10 ƀơi djop sang hră kơnuk kơna tơring čar Lâm Đồng dưi ngă tui mơ̆ng lơ 25-30/5 pơ anăp hăng hơdră čih anăn pơmut amăng internet (ngă hră online). Bruă sem lăng ruah puang dưi pơphun mơ̆ng lơ 15-24/7 hăng ngă giong bruă jŭ yap sem puang iâu pơmut lĕ hlâo kơ lơ 31/7 thun anai. Giong anun, djop sang hră gưl klâo gah rơngiao kơnuk kơna, hơdôm sang hră pơtô re se, anih pơtô bruă mă ƀơi Lâm Đồng amra pơphun čih anăn pơmut mơnuih hrăm hăng ngă giong hlâo kơ lơ 31/8/2026.