Thun blan rơgao, mơnuih ƀôn sang djŏp djuai ania ƀiă hăng čư̆ siăng amăng dêh čar gir run pok pơhai ngă tui dưm kơnar djŏp tơlơi djru ƀơi kual mơnuih ƀôn sang djuai ƀiă hăng čư̆ siăng wơ̆t hăng hơdă djru mơnuih ƀôn sang bơwih ƀong pơplih na nao, tơlơi bơwih ƀong jai hrơi phara, đĭ tui; prăk pơhrui lu tui mơn. Mrô sang anŏ rin aset tui; bruă pơtô hrăm, ia jrao hơmâo lăng ba; gru grua tơlơi phiăn hiam hơmâo djă pioh hăng pơtrut tui. Tơlơi rơnuk rơnua hơmâo hơđong; mơnuih ƀôn sang djŏp djuai ania gum pơgôp jai hrơi kjăp tui. Rơnoh đĭ kyar bơwih ƀong mơ̆ng hơdôm boh tơring čar kual mơnuih ƀôn sang djuai ƀiă hăng čư̆ siăng đĭ lu, amăng anun hơdôm boh tơring čar kual Tây Bắc đĭ rim thun 8%, Dap Kơdư đĭ 7,5%, Tây Nam Bộ đĭ 7%...

Tui hăng Khua ding jum, Khua Jơnum min Djuai ania ơi Hầu A Lềnh, amăng thun laih rơgao, bruă wai lăng djuai ania ăt dŏ mơn lu tơlơi aka ƀu dưi ngă, amăng anun, bruă pok pơhai hơdôm kơčăo bruă, jơlan hơdră ăt dŏ gun, aka ƀu rơđah mơn, amăng anun Jơlan hơdră dêh čar ta pơtrun kơ djuai ania ƀiă hăng čư̆ siăng aka ƀu dưi ngă tui hăng hơnong pơkă:“Bruă pok pơhai ngă bruă ăt hơmâo mơn anih ngă bruă gir run biă mă yơh, hơmâo rơnoh prăk brơi lu biă, wơ̆t tuh pơ alin hăng mă yua, samơ̆ ăt hơmâo mơn anih bruă pok pơhai ngă bruă aka ƀu tañ, ƀu djơ̆ hăng tơlơi pơkă ôh. Yap tong krah amăng dêh čar, Jơlan hơdră dêh čar pơtrun kiăng ngă hơmâo mrô prăk brơi lu, samơ̆ pơhmu hăng tơlơi kiăng mơ̆ng Kơnuk kơna lĕ aka ƀu dưi ngă ôh. Tơlơi thâo hluh mơ̆ng ană plơi, tơlơi gum ngă mơ̆ng abih bang mơnuih aka ƀu hơmâo đơi ôh”.

Thun 2025, Jơnum min Djuai ania ba tơbiă 12 mơta bruă yôm phun, amăng anun gir run pok pơhai, ngă giong bruă dưm dăp mơnuih mă bruă wai lăng djuai ania ƀơi gơnong dlông hăng plơi pla, đah mơ̆ng dưi mă bruă mơ̆ng akŏ thun 2025. Ƀơi mông jơnum, ƀing pơ ala brơi mơ̆ng tơring čar plơi pla ăt lăi pơthâo mơn tơlơi tơnap tap, tơlơi ngă gun amăng mông ngă bruă, laih dong rơkâo hơmâo hơdră pơsir brơi.

Pơhiăp ƀơi mông Jơnum, Kơ-iăng khua dêh čar ơi Nguyễn Hoà Bình pơsit, bruă wai lăng djuai ania lêng kơ hơmâo Ping gah hăng Kơnuk kơna lăng ba tui jơlan hơdră dêh čar pơtrun sit nik mut amăng tơlơi hơdip mơnuih ƀôn sang djuai ƀiă hăng čư̆ siăng. Tơlơi bơwih ƀong đĭ, tơlơi hơdip mơnuih ƀôn sang djuai ƀiă hăng čư̆ siăng pơplih tui, mơ̆ng anun pơƀuh hơdră djru mơ̆ng Ping gah hăng Kơnuk kơna ta mut amăng tơlơi hơdip laih. Khă hnun, amăng thun 2024, Jơnum min wai lăng djuai ania ăt dŏ m7/14 mơta bruă aka ƀu dưi ngă, anun jing Kơ-iăng khua dêh čar ơi Nguyễn Hoà Bình kiăng khŏm ngă giong amăng kŭi 1 thun 2025. Jơnum min wai lăng djuai ania kiăng pơsit rơđah glăi bruă kiăng ngă, gir kơtir, gơgrong bruă kơđi čar hăng mơnuih ƀôn sang djuai ƀiă hăng čư̆ siăng, kiăo tui djơ̆ jơlan hơdră ngă bruă mơ̆ng Ping gah, Tơlơi pơtrun mơ̆ng Khua mua pơ ala mơnuih ƀôn sang dêh čar hăng lu jơlan hơdră ngă bruă prong:“Jơlan hơdră ngă bruă lu, hơmâo lu anih tuh pơ alin, yua hnun tơdah ƀing ta ƀu dưi ngă brơi klă kơ neh met wa lĕ tơlơi soh mơ̆ng ƀing ta yơh. Yua hnun ƀing ta khŏm sem lăng akŏ pơdong anom bruă mă bruă hơdeč hmar, tŭ yua hloh, mơnuih mă bruă amra dưi ngă hơdôm bruă jao phrâo. Tơlơi gêh gal hơmâo mơn, tơlơi tơnap hơmâo mơn. Tơnap lĕ bruă mă lu, hơmâo tơlơi pơplih mơ̆ng ngŏ truh pơ yŭ, samơ̆ gêh gal ñu lĕ hơmâo anŏ kjă či pơsir hĭ bruă kiăng pơsir anun lĕ pơđĭ tui tơlơi hơdip neh met wa”.

Kơ-iăng khua dêh čar ơi Nguyễn Hòa Bình ăt kiăng mơn, thun 2025 gir ngă giong sang dŏ brơi kơ sang anŏ rin; laih dong thun 2025 khŏm tum pơƀut Jơlan hơdră dêh čar pơđĭ kyar bơwih ƀong huă - mơnuih mơnam kual mơnuih ƀôn sang djuai ƀiă hăng čư̆ siăng rơwang sa, laih anun prăp lui klă rơwang 2 dong, khut khăt ƀu pioh bruă hơget ôh amăng dua rơwang ngă bruă dŏ đom hnưh.