Tlam mơmot lơ 8/2, tơdơi kơ trun pơ tơdron rơdêh por Changi, Singapore, Khua dêh čar ta hăng bơnai ñu hrŏm hăng khua mua prong mơng Việt Nam hơmâo nao bưp ƀing khua, mơnuih mă bruă amăng Sang anih jưh pơ ala dêh čar hăng mơnuih ƀon sang Việt Nam ƀơi Singapore.

Ƀơi mông bưp, Khua dêh čar ta mơ-ak biă mă lơ̆m nao sit nik nao čuă Singapore lơ̆m ñu ngă Khua dêh čar Việt Nam, laih anun hơmâo bưp, pơhiăp tom jê̆ giăm hăng neh met wa, ƀing khua, mơnuih ngă bruă amăng Sang anih jưh pơ ala dêh čar ta ƀơi Singapore. Khua dêh čar kơnang, boh than amăng tal nao čuă amra jing tơlơi gêh gal phrâo pơtrut bruă ngă hrŏm jai hrơi kơjăp, dlăm, sit nik, tŭ yua kơplah wah dua boh dêh čar, dua djuai ania ƀơi djŏp mơta bruă. Pô ngă khua Kơnuk kơna Việt Nam ăt lăi pơthâo mơn hrơi mông ngă bruă tom neh met wa pơ anai, ñu brơi thâo, hrơi anai, ñu amra jơnum hăng pơhiăp tom Khua dêh čar Lý Hiển Long hăng ƀing khua mua pơprong pơkŏn dong mơng Singapore. Khua dêh čar ta amra pơčrông sai hăng Khua git gai lŏn ia Singapore kơ hơdră ngă bruă rơđah rơđong, kơnang nao rai, pơđĭ tui bruă ngă hrŏm yôm phun hluai tui hơdôm bruă ngă hrŏm phun, biă ñu amăng bruă bơwih ƀong; anăp nao akŏ pơjing “Tơlơi ngă hrŏm bơwih ƀong mrô - Bơwih ƀong mơtah mơda Việt Nam - Singapore”.

Kơ hơdôm tơlơi kiăng khăp, tơlơi rơkâo mơng neh met wa, Khua dêh čar ta thâo hluh, thâo pap brơi, pơhmư̆ hơdôm tơlơi pơgôp hiăp anun, laih anun amra jao glăi kơ hơdôm ding jum, anom bruă bơdjơ̆ nao pơƀut glăi, sem lăng, tañ hơmâo hơdră pơsir brơi lăp djơ̆, tañ, pơsir brơi klă.