Hlâo anun, mơguah lơ 9/2 (tui mông ƀơi Singapore), Khua dêh čar ơi Phạm Minh Chính hăng bơnai ñu hơmâo nao dưm guang bơnga ƀơi gong kut Khua mir sir Hồ Chí Minh ƀơi Sang djă pioh anŏ hiam klă kual Asia hăng nao čuă đang pla kyâo pơtâo Singapore.

Sang djă pioh hơdôm ano hiam klă kual Asia jê̆ giăm ia krông Singapore, lĕ sang djă pioh gơnam amăng kual kơnong brơi mơnuih mut sem lăng anŏ hiam mơng rup rap amăng kual Asia; hơdôm pok rup pơdah tơlơi pơlir hơbit gru grua amăng kual Asia hăng kơplah wah Asia hăng jar kmar. Amăng anih prong rơhaih ƀơi Sang djă pioh, hrŏm hăng Khua mir sir Hồ Chí Minh laih dong rup trah lu khua mua, ƀing rơgơi kơhnâo amăng kual Asia pơkŏn dong hơmâo dưm ƀơi anai. Khua dêh čar, bơnai ñu hăng grup hyu mă bruă hơmâo dưm guang bơnga, hơ-ŭ hơdor tơlơi gum pơgôp prong prin mơng Khua mir sir Hồ Chí Minh, mơnuih sông kơtang djru pơklaih rơngai lŏn ia, hăng mơnuih rơgơi kơhnâo amăng rŏng lŏn tơnah.