Khua dêh čar jao bruă kơ Kơ-iăng khua dêh čar ơi Trần Hồng Hà pô nao pơ anih hơmâo tơlơi truh, git gai bruă mă; rơkâo jơnum min mơnuih ƀôn sang ƀôn prong Hà Nội khom pơčrâo bruă pơpha khua mua nao tơña bla, juh alum hmao kru, djru ba gơnam kơ sang anŏ hơmâo tơlơi truh; hơdai gum hrŏm tong ten hăng Ding jum kông an git gai ling tơhan djop sang bruă nao djru rŭ glăi, pơsir tơlơi răm ƀăm truh. Mơguah lơ 24/5, ƀơi mông jơnum lok 7, khua mua pơ ala mơnuih ƀôn sang dêh čar, Jơnum min apăn bruă phun pơ ala mơnuih ƀôn sang dêh čar hơmâo pioh mông mơ-it hiăp juh alum, rơngôt hning hrŏm sang anŏ mơnuih ƀôn sang hơmâo tơlơi truh.

Kơ-iăng Khua pơ ala mơnuih ƀôn sang dêh čar ơi Trần Quang Phương ba akŏ grup khua mua nao tơl anih hơmâo tơlơi truh hăng nao pơ sang ia jrao čuă mơnuih ruă, tơña bla, juh alum ƀing hơmâo tơlơi truh. Ding jum kông an hơmâo lăi pơthâo hăng Khua dêh čar kơ phun tơdŭ hơmâo tơlơi truh, răm ƀăm kơtang anai amăng ƀôn prong Hà Nội. Laih dơ̆ng, rơkâo khua dêh čar hơmâo tơlơi pơčrâo bruă, git gai anom bruă ping gah, jơnum min mơnuih ƀôn sang ƀôn prong Hà Nội jŭ yap glăi abih sang dŏ, anih brơi apah sang dŏ hăng hơbô̆ sang dŏ hrup anun amăng đơ đam ƀôn prong.