Anom R&D phrâo mơng Samsung ƀơi Hà Nội dưi pok phun pơdŏng blan 3/2020, ƀơi kual lŏn prong rơbêh kơ 11.600 m2, hmâo sang prong 16 tal hăng dlông hăng 3 tal gah rơgôp, abih bang prăk tuh pơplai 220 klăk dolar Mi. Anom R&D mơng Samsung ƀơi Hà Nội lĕ Anom R&D prong hloh Đông Nam Á hăng jing sa amăng 18 bôh Anom R&D mơng Samsung ƀơi djop rŏng lŏn tơnah. Ƀơi Anom R&D Hà Nội, Samsung pơkă hlâo amra pơphun kơsem min hăng pơđĭ kyar telephone djă hyu ƀơi tơngan hơdeč hmar, măi kompiutơr, akô̆ măi amăng lăm măi, ngă pơhưč năng ai 3.000 čô mơnuih mut mă bruă. Pơhiăp amăng mông mă yua, Khua dêh čar ta ơi Phạm Minh Chính lăi rơđah, Anom R&D mơng Samsung mă yua jing phun than pioh Samsung ngă tui pơplih phrâo hơdôm tơhnal pơkă pơđĭ kyar; jing anô̆ pơdah kơ hơdôm hơdră pơtrun, hơdră bruă djơ̆ mơng Ping gah, Kơnuk kơna Việt Nam amăng bruă iâu pơthưr hăng ngă pơhư̆č tuh pơplai kơ bôh thâo phrâo măi mok, pơplih phrâo pơčeh phrâo, pơđĭ kyar hơdră phrâo măi mok. Khua dêh čar ta ơi Phạm Minh Chính rơkâo hơdôm bôh ƀirô dêh čar hăng gong gai plơi pla djru dong hăng ngă gal brơi dong kơ ƀing tuh pơplai dêh čar tač rơngiao, amăng anun hmâo Grŭp Samsung tuh pơplai bơwih ƀong sĭ mơdrô ba glăi bôh tơhnal hăng sui thun ƀơi Việt Nam.

Ăt amăng mơguah lơ 23/12, Khua dêh čar ơi Phạm Minh Chính hơmâo tŭ jum ơi Lee Jae Yong, Khua Group Samsung Khua anom bruă Samsung. Ƀơi mông bưp, Khua dêh čar bơni kơ tơlơi gir run mơ̆ng anom bruă Samsung amăng bruă ngă pơgiong Anih anom prong kơsem min R&D, bơni kơ Samsung hơmâo djru hrom Việt Nam pô gơgrong ba jing anom bruă sĭ mơdrô FDI prong hloh, pơdah pran jua pap mơ̆n hăng anom bruă Samsung kơ hơdôm tơlơi tơnap tap, thun blan hơmâo klin kheng Covid 19, laih anun pơpŭ kơ Samsung amra tŭ yua hloh amăng bruă mă ƀơi Việt Nam. Khua dêh čar ăt rơkâo kông ty pơđĭ tui rơnoh sĭ mơdrô amăng dêh čar Việt Nam, pơhrŏ ƀiă blơi mơ̆ng dêh čar tač rơngiao, pơkra ming amăng Việt Nam mơtam. Khua anom bruă Samsung lăi, amra gir run hloh pok pơhai hơdôm boh yôm phun mơ̆ Khua dêh čar  git gai; pơtrut pơtô pơhrăm, pơđĭ kyar mơnuih mă bruă kiăng dưi djop anŏ kiăng amăng rŏng lŏn tơnah hăng ngă hrom gah dêh čar Việt Nam pioh pơtrut tui lu hloh mrô sĭ mơdrô amăng dêh čar wơ̆t gơnam pơkra ming gơnam pơjing rai boh thâo ia rơgơi.