Amăng hơdôm hrơi nao čuă sit nik dêh čar Lao, tlam lơ 11/1/2023, ƀơi Ƀrô Khua pơ ala mơnuih ƀon sang dêh čar Lao, Khua dêh čar ơi Phạm  Minh Chính bưp Khua git gai pơ ala mơnuih ƀon sang dêh čar Lao ơi Saysomphone Phomvihane. Amăng mông bưp, dua čô khua pơsit tong lêng kơ lăng yôm hăng đing nao hloh bruă hơkrŭ glăi hăng kơtưn tơlơi rô nao rai giang mah hing ang, gum pơgôp yôm phăn hăng ngă hrŏm djop mơta Việt Nam - Lao; tơlơi rô nao rai ngă hrŏm dua bơnah ăt tŏ tui pơđĭ kyar amăng djop mơta bruă.

Khua git gai pơ ala mơnuih ƀon sang dêh čar Lao čang rơmang ƀu pơdơi ngă kjăp tui tơlơi rô nao rai ngă hrŏm kơplah wah dua Ƀirô Khua pơ ala mơnuih ƀon sang dêh čar. Khua git gai pơ ala mơnuih ƀon sang dêh čar Lao ăt bơni Việt Nam hơmâo dong yua, djru brơi prong prin kơ dêh čar Lao amăng hrơi blan laih rơgao, amăng anun hơmâo bruă man pơdong brơi Ƀirô Khua pơ ala mơnuih ƀon sang dêh čar Lao; pơsit tong lêng kơ dong yua hăng ƀu pơdơi ngă kơtưn hăng dơlăm tui tơlơi rô nao rai giang mah hing ang, gum pơgôp yôm phăn hăng ngă hrŏm djop mơta Việt Nam - Lao.