Khua dêh čar ơi Phạm Minh Chính lăi pơtong, Việt Nam lăng yom hăng čang rơmang ngă hrŏm giăng mah pŭ ƀăn hăng hơdôm dêh čar gơyut mơ̆ng hlâo gơyâo mơ̆ng hơđăp amăng kual Ngŏ Mi kô̆, amăng anun hơmâo dêh čar Ba Lan lĕ sa amăng hơdôm bơnah ngă hrŏm đing nao blung a mơ̆n. Ƀơi mông bưp, dua čô khua pơdah pran jua hok mơak kơ hơdôm yak rơbat bruă mă hiam klă mơ̆ng tơlơi rô nao rai plah wah Việt Nam hăng Ba Lan dưi ngă amăng djop tơhnal pơkă.

Tơlơi bơwih ƀong huă-sĭ mơdrô jing hĭ sa tơlơi pơtong yom kơ bruă ngă hrŏm dua bơnah hăng rơnoh prăk pơhrui glăi thun 2020 truh ră anai lêng kơ hơmâo rơbêh 2,5 klai USD, kơnong amăng thun 2024 rơbêh 3 klai USD, ba dêh čar Ba Lan jing bơnah ngă hrŏm sĭ mơdrô prong hloh mơ̆ng Việt Nam ƀơi kual Tong krah hăng Ngŏ Mi kô̆. Khua mua dua bơnah dêh čar hơmâo pơčrong sai hăng anăp ngă bruă yom kiăng ba tơlơi ngă giăng mah pŭ ƀăn jai hrơi pơđĭ kyar hloh, tŭ yua, tañ pơđĭ tui tơlơi ngă giăng mah Việt Nam-Ba Lan đĭ nao amăng yak phrâo.