Dua čô khua tŭ ư pơsit glăi bruă dua bơnah tañ pơphun bruă pơtom hiăp hăng pơbưp khua mua pơprong hăng djŏp gưl tơdơi kơ pok amăng glăi jing djru ngă kơjăp tui pran jua đăo gơnang, pơsir brơi tơlơi tơnap, pok jơlan brơi bruă ngă hrŏm rŭ glăi hăng pơđĭ kyar, djru akŏ pơdong tơlơi bơwih ƀong mă hơjăn, mut hrŏm hăng jar kmar dlăm hloh.

Lăng djơ̆ pran hăng hơdôm tơlơi đĭ kyar kơtang amăng tơlơi rô nao rai Việt Nam - Singapore amăng djŏp mơta bruă, dua čô khua tŭ ư ngă dlăm kơjăp tui hơdôm gong tơmeh phun gah bruă ngă hrŏm, biă ñu kơđi čar, bơwih ƀong, rơnuk rơnua, ling tơhan, pơtô pơjuăt mơnuih ngă bruă rơgơi, biă ñu ƀơi hơdôm anom bruă prong, khua wai lăng; pơtrut tui bruă pơbưp nao rai mơnuih ƀon sang, pơtrut bruă tuai hyu čuă ngui; pơtrut kơtang tui tơlơi pơčeh phrâo ngă hrŏm gah ia rơsĭ; ăt kah hăng ngă hrŏm amăng bruă phrâo lăp djơ̆ hăng rơnuk mă yua boh thâo 4.0. Dua bơnah ăt ƀuăn pơtrut ngă hrŏm amăng hơdôm mông jơnum lu bơnah kah hăng ASEAN, APEC, Sang gum hơbit djŏp dêh čar; biă ñu ngă hrŏm akŏ pơjing Mơnuih ƀon sang ASEAN pơđĭ kyar hơđong, gum pơgôp, kơjăp phik.