Tlam lơ 10/2, Khua dêh čar ơi Phạm Minh Chính git gai jơnum tal 11 khul git gai lăng glăi bruă ngă tui tơlơi pơtrun mrô 18-NQ/TW mơng gơnong glông. Jơnum đing nao pơgôp hiăp kơ bruă dưm dăp amăng anom bruă pel ĕp brơi hơbot, kjăp bruă, ngă bruă klă, tŭ yua. Amăng anun, sem lăng kơ hơnong pơkă, tơlơi pơkă mơng bruă dưm dăp anom bruă pel ĕp; pơsit tong bruă mă, bruă jao, hơbô̆ bruă pơphun ngă bruă; rơkâo dưm dăp gơnong bruă pel ĕp tui 2 gưl mơng gơnong glông hăng ƀon lan lĕ gưl tơring čar. Đĭ pơhiăp pơđut mông jơnum, Khua dêh čar ơi Phạm Minh Chính lăi pơtong, bruă dưm dăp anom bruă pel ĕp kiăng ba glăi tơlơi dưi lŏn ia, mơnuih ƀôn sang lu prong hloh; kiăo tui hơdră bruă, tơlơi črâo trun mơng Ping gah hăng Kơnuk kơna, pơhlôm pơhrŏ anih anom hăng hơdră bruă, hrưn đĭ ngă bruă klă, tŭ yua mơng gơnong bruă pel ĕp.

Hrŏm hăng anun, bruă dưm dăp anom bruă kiăng pơsir hĭ hơdôm tơlơi gun, anŏ aka ƀu klă, bơdjơ̆ nao rai amăng bruă pơphun bruă mă mơng hơdôm anom bruă pel ĕp ră anai. Khua dêh čar rơkâo anom bruă pel ĕp kơnuk kơna, Ding jum pơphô bruă hăng anom bruă bơdjơ̆ nao ječ ameč pơgiong akŏ bruă kiăng mơ-it nao Ding jum kơđi čar hăng Khul git gai gơnong glông sem lăng hăng pran lui  mơ-it nao Khua pơ ala mơnuih ƀôn sang dêh čar tơdơi kơ Ding jum kơđi čar pơgôp hiăp giong.