Pơhiăp ƀơi mông jơnum, Khua dêh čar kiăng ding kơna amăng Kơnuk kơna pơblang rơđah kơđi tơlơi amăng kual, rŏng lŏn tơnah, črâo pơƀuh hơdôm tơlơi gêh gal, tơlơi tơnap kiăng hơmâo hơdră pơsir djơ̆; ba tơbiă hơdôm bruă mă, pơtrut tui hloh hơdôm tơlơi gêh gal, pơsir brơi tơlơi tơnap mơng anom bơwih ƀong, mơnuih ƀon sang đah mơng pơtrut pơđĭ kyar.

Tui hăng tơlơi lăi pơthâo, bruă bơwih ƀong huă mơnuih mơnam amăng blan 2 hăng 2 blan akŏ thun hơđong mơn, lu bruă pơđĭ kyar hmư̆ hing. Prăk pơhrui glăi mơng bruă blơi sĭ gơnam hăng čar rơngiao blan 2 đĭ 6,1% pơhmu hăng blan 1. Bruă ngă hmua, pla glai, akan hơdang hơđong laih anun đĭ kyar. Pơkra gơnam măi mok hơmâo rŭ glăi laih.