Pơhiăp git gai mông jơnum, Khua dêh čar ơi Phạm Minh Chính lăi pơtong, brơi pơtô glăi tong ten, ngă tui sa amăng plĕ, khut khăt hloh, tŭ yua hơdôm bruă mă, hơdră pơsir tui tơlơi Klah čun mơ̆ng Gơnong dlông, Ding jum kơđi čar, Hră pơtrun mơ̆ng Khua pơ ala mơnuih ƀôn sang dêh čar, Kơnuk kơna, khut khăt ngă tui, tơlơi gir run khom ngă ba glăi tŭ yua tơhnal pơtrun, rơnoh pơkă, bruă mă pơđĭ kyar bơwih ƀong huă thun 2023 pơtrun. 

 Amăng anun, bruă mă kơđi čar yôm biă mă kiăng pơtrut mă yua rơnoh prăk tuh pơ alin kơ bruă tuh tia pơkra ming hăng pok pơhai Hơdră rŭ glăi hăng pơđĭ kyar bơwih ƀong huă mơnuih mơnam, 03 mơta bruă pơtrun mơ̆ng dêh čar. Khua dêh čar lăi pơtong, hơdôm bruă mă anai hơmâo tơlơi gơgrong yôm bơwih ƀong huă, kơđi čar, mơnuih mơnam, pơgang lŏn ia, rơnuk rơnua hơđong, pơsir anŏ gun, pơjing atur pơtrut nao rai, ngă hơđong bơwih ƀong huă hlom bom, lui rơmŏn kŏn rin, pơđĭ tơlơi kơtang amăng lăm lŏn ia, pơjing pran kơtang rŭ glăi bơwih ƀong huă hmar hăng pơđĭ kyar hơđong kjăp.