Đĭ pơhiăp amăng mông jơnum, Khua dêh čar ơi Pham Minh Chính lăi pơtong, thun 2024 lĕ gơgrong ngă tui akŏ bruă pơđĭ kyar bơwih ƀong huă mơnuih mơnam 5 thun mơng 2021-2025, pơtrut kơtang pơplih yua boh thâo phrâo dêh čar; pơđĭ kyar kơnuk kơna, bơwih ƀong, mơnuih mơnam yua boh thâo phrâo; đing nao 03 tơhnal pơplih hơmâo hơdră bruă, mơnuih mă bruă, sit biă ñu mơnuih mă yua rơgơi, amăng anun đing nao mơnuih mă bruă amăng pơplih yua boh thâo phrâo, dưm truă pơplih pơkra, amăng anun dưm truă măi mok.

Khua dêh čar pơsit tong, pơplih yua boh thâo phrâo lĕ bruă jao phun, pơplih phrâo  amăng ngă tui hơdôm hơnong pơkă pơđĭ kyar bơwih ƀong huă mơnuih mơnam. Amăng mông jơnum, Khua dêh čar rơkâo ƀing khua mua đing nao pơčrông sai kơ tơlơi sit nik pok pơhai bruă pơplih yua boh thâo phrâo hăng akŏ phun lĕ pơđĭ kyar bơwih ƀong, hơdôm boh than ba glăi, anŏ aka ƀu klă, hơdră pơsir hĭ phun kiăng ngă tui kơtang hloh bruă jao hơmâo ba tơbiă amăng akŏ bruă thun 2024 mơng Jơnum min dêh čar kơ bruă pơplih yua boh thâo phrâo.