Tlam lơ 2/2 ( anai lĕ lơ 5 tết), ƀơi Lạng Sơn, amăng pran jua hur har pioh hơdor glăi 95 thun hrơi akŏ pơjing Ping gah Cộng sản Việt Nam (3/2), đơ đam dêh čar ngui mơ-ak bơyan bơnga Ất Tỵ, Khua dêh čar ơi Phạm Minh Chính git gai jơnum hăng djop ding jum, gơnong bruă, gong gai ƀon lan kơ bruă pơtrut tañ čuk pơkra jơlan rơdêh đuăi hmar Đồng Đăng (Lạng Sơn)-Trà Lĩnh (Cao Bằng) hăng amăng jang giang mah-Chi Lăng. Khua dêh čar hơmâo trun nao lăng ƀơi 4 anih čuk pơkra dua ring bruă anai, juh alum pran jua, ƀơk gơnam tết brơi ƀing apăn bruă, kông ñơn ƀơi anih man pơkra. Pơsit tong hơnong pơkă kiăng pơgiong 2 ară jơlan rơdêh đuăi hmar anai amăng thun 2025 kiăng pơgôp pok phư hơdôm ară jơlan rơdêh đuăi hmar Cao Bằng nao pơ Cà Mau amăng thun anai, Khua dêh čar hok mơ-ak hăng pran jua hur har mă bruă amăng hơdôm hrơi ngui ƀong tết ƀơi 2 ară jơlan anai.

Khua dêh čar lăng yôm hăng rơkâo hơdôm anom bruă tuh pơ alin kiăng tŏ tui gir run găn rơgao tơnap tap kiăng hrưn đĭ, ngă tañ ƀiă dong; pơpha lu mơnuih mă bruă, măi mok, bruă man pơkra; kơtưn mă yua boh thâo phrâo, pơplih pơčeh phrâo, pơhlôm rơnuk rơnua ƀơi anih man pơkra; pơhlôm djơ̆ hrơi mông hăng gir run mah ngă tañ samơ̆ kiăng pơhlôm kjăp.