Nao čuă, juh alum pran jua mơnuih ƀôn sang Việt Nam ƀơi sang sĭ mơdrô pơprong Sapa, Khua dêh čar ơi Phạm Minh Chính hơmâo nao čuă anih pơtô tơlơi Yuăn ƀơi Praha. Ƀing nai pơtô hăng pran jua djru ba, ƀu hơmâo mă prăk apah mơ̆ kơnong mrô prăk djru brơi aset tui mông pơtô đôč. Amăng 22 thun rơgao, anih pơtô hrăm hơmâo pơtô brơi tơlơi yuăn brơi hơdôm rơbâo čô čơđai tơkeng rai hăng rŭ prong ƀơi dêh čar Czech dưi pơđok, thâo čih, pơhiăp tơlơi yuăn.

Khua dêh čar ơi Phạm Minh Chính lăi pơtong, tơlơi yuăn lĕ boh pơhiăp kiăng tô nao rai rơnuk hlâo hăng tơdơi, djru brơi rơnuk ană tơčô Việt Nam pơ tač rơngiao thâo hluh ƀiă dong gru grua mơng dêh čar ta, pơsur pran khăp lŏn ia, pơ-ư ang djuai ania. Rơkâo sang pơtô hrăm tŏ tui bruă ngă djop mơta, bruă pơtô hrăm, pơtrut pơsur ƀing čơđai kiăo tui hrăm.