Ƀơi amăng jang jar kmar Tà Lùng, tơring glông Quảng Hòa, Khua dêh čar ơi Phạm Minh Chính hmư̆ Khua git gai Ping gah tơring čar Cao Bằng Trần Hồng Minh lăi pơthâo akŏ bruă, jơlan gah pơđĭ kyar kual bơwih ƀong amăng jang jar kmar Cao Bằng. Tui hăng tơlơi pơkă, kual bơwih ƀong  ƀơi amăng jang tơring čar Cao Bằng hơmâo ha bơnah ƀudah đơ đam amăng 31 boh să hăng 3 boh tơring kual giăm guai (mơng să Cần Nông, tơring glông Hà Quảng truh pơ să Đức Long, tơring glông Thạch An).

Khua dêh čar lăi pơtong, kual bơwih ƀong huă amăng jar kmar ƀơi Cao Bằng hơmâo tŭ yap amăng blan 3/2022, anai lĕ phun pơtrut pơđĭ kyar phrâo amăng tơring čar Cao Bằng. Kiăng ngă tui tơlơi anai, Khua dêh čar rơkâo tơring čar pok pơhai sa, dua bruă jao anun lĕ tŏ tui gơgrong, gir run pơhlôm glông guai rơnuk rơnua, giang mah, ngă hrŏm, pơđĭ kyar Việt Nam-Khač.

Tlam lơ 16/1, Khua dêh čar ơi Phạm Minh Chính hrŏm hăng khua mua Kơnuk kơna mă bruă hăng khua mua tơring čar Cao Bằng.