Amăng tal nao mă bruă ƀơi tơring čar Bình Định, tlam lơ 5/2, Khua dêh čar ơi Phạm Minh Chính mă bruă hăng khua mua tơring čar Bình Định kơ tơlơi pơhing bơwih ƀong huă thun 2022, pok pơhai bruă mă bơwih ƀong huă mơnuih mơnam thun 2023 ; pơsir hơdôm tơlơi rơkâo kiăng djru tơring čar Bình Định pơđĭ tui klă hloh anŏ gêh găl, tơlơi kơtang, pơđĭ kyar hmar, hơđong kjăp. Klah čun ƀơi mông jơnum, Khua dêh čar ơi Phạm Minh Chính čih pioh, bơni kơ ping gah, gong gai kơnuk kơna hăng mơnuih ƀôn sang tơring čar Bình Định hơmâo gum pơgôp pran jua mă bruă, gir run, kơtưn hăng mă bruă hơmâo boh tŭ yua klă amăng tơlơi bơwih ƀong huă mơnuih mơnam, djru pơgôp hrom bruă mă hrom amăng dêh čar.

Khua dêh čar rơkâo Bình Định kiăng lăng tui tong ten  bruă mă sit nik rĭm hrơi, kiăng lăi pơthâo pơkra hơdră mă bruă djơ̆ lăp hloh; pơđĭ tui pran jua hur har gir run amăng lăm, kah hăng tơlơi kơtang gru grua rơnuk Tây Sơn đưm đă; pơtrut ngă tui pơpha bruă mă djop gưl gong gai kơnuk kơna; thâo pơčeh phrâo, ba yua boh thâo ia rơgơi; pơđĭ kyar bơwih ƀong huă hăng mrô, bơwih ƀong huă mơtah mơda, mă bruă pơdar nao rai ƀu lui soh sel boh tơhnal mă bruă, đing nao kơ bruă akŏ pơdong ping gah, glông bruă kơđi čar.