Kiăng pơgôp ngă pơgiong, djop mơta hơdôm hơnong pơkă akŏ bruă pơđĭ kyar bơwih ƀong huă-mơnuih mơnam thun 2023, Ding jum sĭ mơdrô đing nao pok pơhai hơdôm bruă jao anun lĕ: pok pơhai ha amăng plĕ, tŭ yua jơlan hơdră bruă mă mơng gơnong bruă sĭ mơdrô ngă tui tơlơi pơtrun mrô 1 mơng Kơnuk kơna; tŏ ngă tui tŭ yua Jơlan hơdră hơkrŭ, pơđĭ kyar bơwih ƀong huă, pơtrut jao prăk čan tuh pơ alin bruă čar, kiăo tui lăng bruă mă, pơsir hĭ tơnap tap kiăng tañ man pơkra hơdôm ring bruă akŏ phun.

Amăng mông jơnum Khua dêh čar ơi Phạm Minh Chính rơkâo, khua mua đing nao pơčrông sa kơ bruă pơđĭ kyar hăng pok pơhai tŭ yua bruă sĭ mơdrô amăng lŏn ia, kơtưn pơsur sĭ mơdrô, pơlir hơbit, pok prong  sĭ mơdrô pơ tač rơngiao; pơtrut kơtang pơkra pơjing hăng sĭ mơdrô, hơmâo lu dong bruă mă kơ mơnuih ƀon sang.