Pơhiăp ƀơi mông ngă bruă, Khua dêh čar ơi Phạm Minh Chính tŭ yap, bơni kơ Ping gah, gong gai kơnuk kơna, tơhan hăng mơnuih ƀon sang tơring čar Hòa Bình hơmâo gum pơgop, gir ngă bruă ba glăi boh than gah bơwih ƀong huă mơnuih mơnam.

Khua dêh čar kiăng tơring čar pơƀut git gai črâo bruă, ngă klă bruă pơkă hơnong čuk pơkra lŏn tơnah hăng pơđĭ kyar anih anom, anai jing bruă kơđi čar yôm phun kiăng ngă hlâo mơng tơring čar; gơñăm nao bruă tuh pơ plai pơkra anih anom bơwih ƀong - mơnuih mơnam, biă ñu lĕ jơlan nao rai. Khua dêh čar git gai tơring čar Hòa Bình khŏm iâu pơthưr abih hơdôm tơlơi gêh gal pioh pơđĭ kyar; pơtrut kiăng tañ brơi prăk tuh pơ plai bruă čar, 3 jơlan hơdră dêh čar pơtrun; pơtrut pơplih phrâo bruă ngă hră pơ-ar, pơplih anih tuh pơ plai, sĭ mơdrô; gơñăm pơđĭ kyar bruă gru grua, mơnuih mơnam, pơgang ayuh hyiăng, wai lăng tơlơi hơdip mơnuih tơnap tap, pơđĭ tui tơlơi hơdip, tơlơi pơmin pran jua mơng mơnuih ƀon sang, djă pioh hăng pơtrut tui gru grua hiam mơng đưm hlâo.