Tlam lơ16/12, Khua dêh čar ơi Phạm Minh Chính hăng grup khua mua mơ̆ng Việt Nam glăi truh pơ Hà Nội laih, pơđut hiam mơak tal nao čuă pơ kual Mi kô̆, nao jơnum hrom khua mua pơprong kual Mi kô̆ EU hăng čuă jơmư sit nik dêh čar Luxembourg, dêh čar Hà Lan, dêh čar Bỉ. Tal nao čuă mơ̆ng khua dêh čar ơi Phạm Minh Chính lĕ gru tơhnal yôm tơlơi ngă giăng mah Việt Nam hăng Luxembourg, Bỉ, Hà Lan, djru pơđĭ tui tơlơi đăo kơnang kơđi čar, pơtrut ngă hrom hlom bom tơlơi ngă giăng mah Việt Nam hăng 3 boh dêh čar amăng rơnuk phrâo kiăng mut tơma kjăp tui, tŭ yua, bơwih brơi tơlơi tŭ yua rơnuk rơnua mơ̆ng Việt Nam laih anun djru bruă pơgang hơđong, rơnuk rơnua, ngă hrom pơđĭ kyar amăng kual hăng amăng rŏng lŏn tơnah.

Jơnum khua mua hơdor glăi 45 thun rô nao rai ASEAN-EU hơmâo boh tŭ yua yôm biă mă, boh nik ñu, anŏ gêh găl klă pioh kơ khua mua dua bơnah pơdah thâo anăp ngă bruă yôm pơđĭ kyar kơtang hloh tơlơi giăng mah ASEAN-EU pơ anăp adih.