Kah hăng abih bang hơdôm tơlơi gum pơhiăp amăng mông jơnum leng kơ tŭ ư hrom lĕ, rơnoh đĭ kyar GDP 8,02% thun 2022 lĕ lăp djă pioh biă. GDP hơnong ñu sa akô̆ mơnuih thun 2022 dưm dưm hăng 4.110 dolar Mi, đĭ 393 dolar Mi bơhmu hăng thun 2021. Pơhiăp klah čun mông jơnum, Khua dêh čar ơi Phạm Minh Chính pơtŏng sit, hơdôm bôh tơhnal dưi hmâo amăng thun 2022 dlông hloh thun 2021 lĕ anô̆ pơdah kơ pran kơtang gum hrom hơbit abih bang djuai ania, tơlơi gum pran hrom, ha pran jua, pran pơsit mơng abih bang glông bruă kơđi čar hăng mơnuih ƀôn sang đơ đam dêh čar gah yŭ tơlơi git gai mơng Ping gah.

Kiăng dưi ngă truh kih tơhnal pơkă, bruă mă kơčăo bruă pơđĭ kyar bơwih ƀong mơnuih mơnam thun 2023 tui Tơlơi pơtrun pơsit mơng Khua pơ ala mơnuih ƀôn sang dêh čar ta, amăng mông Jơnum lăng nao rai mơng ataih mơng Gong gai dêh čar hăng hơdôm bôh tơring čar, ƀôn prong klah čun bruă mă thun 2022, pok pơhai kơčăo bruă pơđĭ kyar bơwih ƀong – mơnuih mơnam thun 2023; Gong gai dêh čar hmâo ba tơbiă 6 mơta tơlơi pơmin, phun tơlơi črâo ba git gai hăng 11 ƀut bruă, jơlan pơsir phun pơđĭ kyar bơwih ƀong mơnuih mơnam thun 2023./.