Tlam tom brơi, lơ 28/5, ƀơi sang bruă kơnuk kơna, Khua dêh čar ơi Phạm Minh Chính tŭ jum Grup khua mua pơ ala mơnuih ƀôn sang mơ̆ng dua ping gah amăng Gơnong yŭ dêh čar Mi hlăk rai čuă dêh čar Việt Nam, yua kơ khua pơ ala ơi John Moolenaar, kual ala čar Michigan, ding kơna Jơnum min ĕp lăng bruă yua prăk kơ anom bruă pơ ala Gơnong yŭ dêh čar Mi ngă khua grup. Ƀơi mông tŭ jum, Khua dêh čar ơi Phạm Minh Chính lăi pơtong, Việt Nam sơ̆n pran jua kiăo tui jơlan gah pơtom hiăp rơngai hơjăn, ngă khua pô, pok pơhư prong, lu bơnah gum hrŏm, lu hơdră ngă giăng mah; laih anun pơsit jơlan hơdră akŏ pơdong atur tơlơi bơwih ƀong huă rơngai hơjăn, ngă khua pô lir hơbit hăng bruă ngă gum hrŏm mut phung jar kmar lu hloh, tŭ yua hăng sit nik.

Khua dêh čar rơkâo kơ ơi Moolenaar hăng ƀing khua mua pơ ala mơnuih ƀôn sang dêh čar Mi ăt đing nao, djru dong yua bruă pơtrut ngă giăng mah dua bơnah, amăng anun sem glăi bruă ba Việt Nam tơbiă đuăi anăn khom sem lăng tong ten gơnam sĭ mơdrô phun hăng pơtrut bruă tŭ yap hĭ Tơlơi phiăn pơkă bơwih ƀong huă anih anom sĭ mơdrô mơ̆ng Việt Nam. Khua pơ ala ơi Moolenaar hăng ƀing khua mua amăng ding kơna grup ăt ƀuăn gir run hloh pơtrut tơlơi ngă giăng mah dua bơnah amăng anun đing nao tơlơi ngă hrŏm bơwih ƀong huă sĭ mơdrô hăng bơkơtuai kơ bruă mă jia dua bơnah.