Khua dêh čar brơi thâo, tơdơi kơ pơđĭ tui tơlơi rô nao rai hăng bơnah ngă hrŏm hlom bom, tơlơi giăng mah Việt Nam hăng Mi ăt pơđĭ kyar dơlăm  tui, tŭ yua, pơjing atur kơjăp brơi kơ bruă ngă hrŏm bơwih ƀong huă, sĭ mơdrô, tuh pơ alin hăng ngă hrŏm amăng lu bruă mă dua bơnah hơmâo tơlơi gêh găl. Amăng thun 2024, lu anom bruă sĭ mơdrô pơprong mơ̆ng dêh čar Mi rơkâo tuh pơ alin, pok prong bruă sĭ mơdrô ƀơi Việt Nam; ngă hrŏm amăng bruă pơtô, pơhrăm, Khua dêh čar rơkâo kơ Group Berggruen Holdings ĕp lăng tuh pơ alin nao amăng hơdôm bruă mă gru grua, pơtô hrăm, gru đưm, djru pôr pơthâo gru grua hiam Việt Nam truh pơ dêh čar tač rơngiao, jar kmar thâo kơ gru grua hiam mơak mơ̆ng djuai ania Việt Nam.

Tŭ ư hăng tơlơi rơkâo mơ̆ng khua dêh čar, ơi Nicholas Berggruen brơi thâo, Group Berggruen Holdings amra ngă hrŏm, tuh pơ alin djru Việt Nam pơtô hrăm mơnuih mă bruă, ƀơi anăp lĕ djru pơtô brơi Việt Nam akŏ pơjing Keh prăk tuh pơ alin pơđĭ kyar, djơ̆ găl hăng bruă pơđĭ kyar mơ̆ng Việt Nam, hăng bưng bôt mơ̆ ping gah Cộng sản Việt Nam hơmâo pơtong rơđah kiăng ba glăi tơlơi hơdip mơda trơi pơđao, yâo mơak kơ mơnuih ƀôn sang.