Amăng mông bưp, Khua dêh čar Phạm Minh Chính rơkâo Khua Ding jum Tiêu Chí Hiền dŏng yua dong hăng pơtrut tơlơi rô nao rai gum hrom kơplah wah Việt Nam hăng Singapore amăng abih bang bruă, hrom hăng bruă yôm phăn lĕ kơtưn đăo gơnang nao rai hluai tui kơtưn bơkơtuai grŭp hăng pơbưp gưl dlông hăng hơdôm gưl.

Lăi pơthâo nao rai hơdôm tơlơi amăng kual hăng jar kơmar hơdai bơ đing nao, dua bơnah tŭ ư hrom amăng mông glêh tơnap ră anai, dua bôh dêh čar khom gum hrom djă pioh tơlơi rơnuk rơnua, hơđong hăng gum hrom amăng kual, pơsir kơđi tơlơi hăng jơlan mơ-ak klă hăng hluai tui tơlơi phiăn jar kơmar; kơtưn gum hrom hơbit, pơlir hơbit, djru pơdong sa ASEAN gơgrong pô, pơđĭ kyar pơdrong asah hăng ngă tui bruă phun, biă ñu amăng hơdôm tơlơi ƀơi kual./.