Khua dêh čar lăi pơthâo brơi neh met wa tơlơi sit nik amăng lŏn ia, thun 2024, Việt Nam hơmâo lu tơlơi dưi yôm phăn amăng djop mơta bruă, pơgiong 15/15 hơnong pơkă pơđĭ kyar bơwih ƀong hă-mơnuih mơnam, amăng anun 12 hơnong pơkă rơgao hăng tơlơi ba tơbiă. Pơđĭ GDP thun 2024 truh 7,09%, rơnoh GDP truh pơ 476 klai đôlar Mi, dong amăng 35 boh dêh čar đĭ đăi amăng rŏng lŏn tơnah. Việt Nam tŏ tui hơđong tơlơi bơwih ƀong huă pok prong, wai lăng klă prăk trun nua, hơdôm bruă pơhlôm bơkơnar hơmâo tŏ tui hơđong.

Ƀrô tal anai, Khua dêh čar hok mơ-ak lăi pơthâo hăng mơnuih ƀôn sang Việt Nam ƀơi dêh čar Czech bruă Jơnum min djop djuai ania mơnuih mơnam Việt Nam hơmâo pơsit ruah Praha lĕ anih pơphun hrơi ngui gum pơgôp djop djuai ania pơ tač rơngiao tal blung a; pơdah tơlơi tŭ yap hăng lăng yôm hơdôm boh than dưi ngă hăng gum pơgôp mơng mơnuih ƀôn sang Việt Nam ƀơi Czech. Khua dêh čar čang rơmang neh met wa ngă tui djơ̆ tơlơi phiăn ƀơi anai, lêng gum pơgôp, djru tơdruă, ngă tui gru grua thâo lăng nao rai, gum pơgôp djuai ania, sit biă ñu amăng hrơi mông bưp tơnap tap.