Dua bơnah čih djă pioh hơdôm bôh than gum hrom yôm phăn dưi hmâo amăng hơdôm hrơi rơgao, biă ñu lĕ bruă sĭ mơdrô dua bơnah đĭ kyar kơtang dong, hmâo 5 klai 300 klăk dolar Mi thun 2022, đĭ 10% bơhmu hăng thun 2021. Khua dêh čar ta ơi Phạm Minh Chính rơkâo Prang ngă gal brơi kơ gơnam tam sĭ kơ dêh čar tač rơngiao mơng dêh čar Việt Nam, biă ñu gơnam mă mơng đang hmua akan hơdang Việt Nam dưi sĭ amăng dêh čar Prang; čang rơmang dua bơnah gum hrom kơjăp dong, mă yua hơdôm tơhnal gal prong mơng Tơlơi pơkôl sĭ mơdrô mơ-ak klă Việt Nam hăng EU kiăng kơtưn sĭ mơdrô nao rai dua bơnah.

Ƀrô djơ̆ tal anai, Khua dêh čar ta rơkâo Prang tañ pơsit Tơlơi pơkôl pơgang ba tuh pơplai Việt Nam hăng EU kiăng ngă gal brơi kơ tơlơi rô nao rai tuh pơplai dưm kơnar, hơdai bơ hmâo yua kơplah wah dua bôh dêh čar; pơtrut Jơnum min kual EU tañ lui hĭ hră kơnĭ IUU hăng akan hơdang Việt Nam, djơ̆ hăng bôh tŭ yua kơ mơnuih blơi yua Prang hăng EU ăt kah hăng pơhlôm tơlơi hơdip kơ hơdôm rơtuh rơbâo čô mơnuih mă bruă gah bruă akan hơdang Việt Nam./.