Pơhiăp amăng mông jơnum, Khua dêh čar ơi Phạm Minh Chính lăi rơđah, kiăng đĭ kyar lĕ khom kơtưn kơjăp bruă mă, hluai tui pơđĭ kyar bôh thâo phrâo hơdră măi mok, pơplih phrâo pơčeh phrâo, pơplih mrô, mơnuih mă bruă kơjăp; pơtô pơhrăm, kơsem min hơdră phrâo măi mok jing hơdră ba jơlan hlâo;  tuh pơplai kơ bôh thâo phrâo hơdră măi mok, pơtô pơhrăm jing tuh pơplai kơ pơđĭ kyar.

Tơdơi kơ hmư̆ hơdôm tơlơi gum pơhiăp, klah čun bruă jơnum, Khua dêh čar ơi Phạm Minh Chính lăi rơđah: Ƀing ta pơplih tơhnal pơkă pơđĭ kyar truh 8% amra đing nao pơđĭ kyar bôh thâo phrâo, hơdră măi mok, pơplih mrô, pơplih phrâo pơčeh phrâo hăng pơtô pơhrăm mơnuih mă bruă kơjăp pioh pơtrut pơđĭ kyar bơwih ƀong. Khua dêh čar pơtŏng sit, pơđĭ kyar bôh thâo phrâo, hơdră măi mok, pơplih mrô, pơplih phrâo pơčeh phrâo hăng pơtô pơhrăm mơnuih mă bruă kơjăp pioh pơtrut pơđĭ kyar bơwih ƀong, jing tơlơi kiăng lăp djơ̆, ruah mă bruă mă, đing nao blung a hăng mă mơnuih ƀôn sang ngă phun, ngă pô. Pơđĭ kyar bôh thâo phrâo, hơdră măi mok, pơplih mrô, pơplih phrâo pơčeh phrâo hăng pơtô pơhrăm mơnuih mă bruă kơjăp djru dăp glăi bruă bơwih ƀong, pơđĭ kyar tañ hăng kơjăp sui thun./.