Ƀrô djơ̆ tal nao pơhmư̆ mông Jơnum Gưl dlông BRICS pok prong ƀơi Kazan, dêh čar Nga, Khua dêh čar ta ơi Phạm Minh Chính hmâo bưp laih Khua git gai Ping gah, Khua mir sir dêh čar Khač ơi Tập Cận Bình. Amăng mông bưp, Khua dêh čar ta ơi Phạm Minh Chính pơtŏng sit Việt Nam lăng pơđĭ kyar tơlơi rô nao rai hăng Khač lĕ hơdră pơtrun ha sa, rơkâo lăp djơ̆, ruah mă bruă, đing nao hlâo amăng jơlan gah pơtom hiăp mơ̆ng Việt Nam.

Gah bruă rô nao rai dua bơnah Việt Nam – Khač, Khua dêh čar ta ơi Phạm Minh Chính pơsit yôm tơlơi rô nao rai dua Ping gah, dua bôh dêh čar hơdôm hrơi rơgao ƀu pơdơi hơkrŭ đĭ hăng pơđĭ kyar, yak truh rơwang pơđĭ kyar phrâo hăng tơhnal pơdŏng Khul lăi pơthâo pơgi kơdih Việt Nam hăng Khač hmâo bôh tŭ yua bruă tui jơlan gah “6 hloh”. Khua dêh čar rơkâo dua bơnah kơtưn dong bruă rôk ruai, pơbưp gưl dlông; pơtrut gum hrŏm sit nik amăng hơdôm bruă nao dơlăm, amăng anun hmâo tô nao rai jơlan glông, biă ñu đing nao pơtrut tañ pok pơhai 3 jơlan rơdêh treng amăng rơwang tô nao rai Việt Nam hăng Khač (Lào Cai - Hà Nội - Hải Phòng, Lạng Sơn - Hà Nội, Móng Cái - Hạ Long - Hải Phòng) kiăng pơtrut tô nao rai dua bôh dêh čar.

            Ăt amăng hơdôm bruă mă nao pơhmư̆ Jơnum gưl dlông ƀing Khua mua BRICS pok prong ƀơi Kazan, dêh čar Nga, Khua dêh čar ta ơi Phạm Minh hmâo bưp laih Khua mir sir dêh čar Kazakhstan, Khua mir sir Turkmenistan hăng Khua dêh čar Ethiopia./.