Čơtlăm lơ 14/5, Ding kơna Ding jum kơđi čar, Khua dêh čar ta ơi Phạm Minh Chính mă bruă hăng Khua ƀôn prong Cần Thơ kiăng pơsit tơlơi bơwih ƀong huă, sĭ mơdrô tuh pơplai pơdong, sĭ gơnam kơ dêh čar tač rơngiao; hơdôm bruă akă dưi ngă, tơlơi gun hăng gum hrom ba tơbiă jơlan gah pơtlaih, pơtrut pơđĭ kyar ƀơi ƀôn prong. Klah čun mông mă bruă, Khua dêh čar ta ơi Phạm Minh Chính čih djă pioh, bơni tơlơi gir run hăng bôh tơhnal dưi hmâo mơng Ping gah, Gong gai, Khul tơhan hăng Mơnuih ƀôn sang ƀôn prong Cần Thơ, djru klă, ba glăi bôh tơhnal hrom hăng đơ đam dêh čar hơđong bruă bơwih ƀong prong, wai lăng nua gơnam, pơhlôm dưm kơnar prong, pơtrut pơđĭ kyar, pơđĭ tui tơlơi hơdip mơda gơnam tam hăng pran jua mơng mơnuih ƀôn sang.

Gah bruă mă pơ̆ anăp anai, Khua dêh čar rơkâo ƀôn prong Cần Thơ lăng tui dong, thâo kơjăp tơlơi; hơđong pran jua, kơjăp, gơgrong hlâo, pơplih tañ, ba glăi bôh tơhnal pioh pơsir hơdôm bruă mă na nao, hơdôm bruă mă phrâo hmâo, hơdôm tơlơi dô̆ glăi akă ngă; đing nao pơtlaih tơnap, tơlơi gun kơ mơnuih ƀôn sang, anom bơwih ƀong kiăng pơtrut bơwih ƀong huă, pơjing bruă mă, jơlan bơwih ƀong kơ mơnuih ƀôn sang./.