Čơtlăm lơ 19/12, Ding jum prăk kak pơphun Jơnum klah čun bruă prăk kak – ngăn drăp Kơnuk kơna thun 2022, pok phun bruă mă thun 2023. Khua dêh čar ta ơi Phạm Minh Chính nao pơhmư̆ hăng pơhiăp git gai mông jơnum. Bruă jơnum dưi pơphun ƀơi anăp pơkĕ hrom hăng lăng nao rai mơng ataih mơng dua bơnah Ding jum prăk kak hăng 62 bôh tơring čar, ƀôn prong. Amăng mông jơnum Khua dêh čar hmâo črâo rơđah hơdôm truh kih hăng akă truh kih laih anun tơlơi kiăng lăng glăi mơng gơnong bruă prăk kak.

Khua dêh čar lăi rơđah, thun 2023 lĕ thun ngă tui Kơčăo bruă pơđĭ kyar bơwih ƀong mơnuih mơnam, prăk kak 5 thun 2021-2025 hăng thun tal 3 Bruă khom pơđĭ kyar bơwih ƀong mơnuih mơnam 10 thun 2021-2030 tui hơdôm tơlơi pơtrun pơsit mơng Ping gah, Khua pơ ala mơnuih ƀôn sang, bruă mă ba tơbiă hăng gơnong bruă prăk kak lĕ prong biă. Khua dêh čar ta phun ñu tŭ ư hăng tơhnal pơkă, rơkâo, bruă mă, jơlan gah pơphun ngă tui kơčăo bruă prăk kak - ngăn drăp kơnuk kơna thun 2023; đing nao črâo ba, gum hrom kơjăp amăng črâo ba, pơphun ngă tui khut khăt mơng hơdôm hrơi akô̆ thun 2023, pơsit pran ngă giong prong hloh hơdôm tơhnal pơkă pơđĭ kyar bơwih ƀong mơnuih mơnam hăng pơkă hlâo ngăn drăp mă yua thun 2023, biă ñu wai lăng nua gơnam, hơđong bơwih ƀong prong, dăp glăi ngăn drăp kơnuk kơna, hnưh dŏng bruă hrom, pơđĭ kyar phun than prăk kak lŏn ia pơhlôm klă, kơjăp phik./.