Mơmot tom brơi (29/1), ƀơi ƀôn prong Hồ Chí Minh Khua dêh čar ơi Phạm Minh Chính nao pơhmư̆ mông ngă lơphet čơkă thun phrâo hăng pơtrun bruă akô̆ thun ƀơi Tơdrun tum păn Tân Cảng - Cát Lái gah Phun akha Sang bruă Tân Cảng Sài Gòn hăng ĕp lăng hơdôm container gơnam amra ba nao pơ̆ dêh čar tač rơngiao akô̆ bơyan bơnga Quý Mão 2023. Khua dêh čar ta ơi Phạm Minh Chính brơi thâo, thun 2023, tơlơi ƀơi rŏng lŏn tơnah ăt kah hăng amăng lŏn ia dô̆ lu tơlơi pơplih tơnap, ƀu thâo him lăng, tơnap pơkă lăng hlâo; amăng anun tơnap, hmâo lu tơlơi lông hloh.

Khă hnun hai, ƀing ta kơjăp đăo gơnang amra ngă giong hơdôm tơhnal ba tơbiă pơđĭ kyar bơwih ƀong mơnuih mơnam thun 2023; djă kơjăp hơđong bruă bơwih ƀong prong, wai lăng nua gơnam, pơtrut pơđĭ kyar hăng pơhlôm hơdôm bruă prong mơng bơwih ƀong. Amăng mông ngă lơphet, Khua dêh čar hăng ƀing khua pơ ala hmâo ngă tui phiăn pơtrun ngă tui tal ba gơnam akô̆ thun Quý Mão 2023 mơng tơdrun tum păn Tân Cảng – Cát Lái, Phun akha Sang bruă Tân Cảng Sài Gòn, djă ba hơdôm tơlơi čang rơmang, đăo gơnang kơ sa thun bruă blơi sĭ gơnam hăng dêh čar tač rơngiao dik dak, truh kih, hăng prăk pơhrui glăi đĭ lu./.