Jơlan đuăi hmar Kơdư – Dơnung gah Ngŏ tal 1 (2017-2020) hmâo abih bang rơwang ataih 652,86 km dưi pơpha jing 11 rơwang bruă (3 rơwang bruă tuh pơplai gum hrom bruă hrom hăng bruă ha jăn PPP hăng 8 rơwang bruă tuh pơplai bruă hrom). Amăng anun, rơwang bruă jơlan đuăi hmar Nha Trang – Cam Lâm ataih rơbêh kơ 49 km, găn tơring glông Diên Khánh, Cam Lâm hăng plơi prong Cam Ranh (tơring čar Khánh Hòa).

Rơwang bruă hmâo abih bang rơnoh prăk mă yua rơbêh kơ 7.600 klai prăk, amăng anun prăk Kơnuk kơna gum hrom năng ai ñu 2.967 klai prăk. Rôk tui jơlan rơwang bruă, Khua dêh čar ta mơ-ak ƀơi anăp jơlan glăk pơjing, lu črăn hmâo pơkra giong. Ƀơi ring bruă glăk man pơkra, Khua dêh čar ta bơni hơdôm bôh ƀirô, anom bruă, khul mơnuih apăn bruă, mơnuih mă bruă hmâo mă bruă laih hăng pran jua “hluh gah Tết”. Khua dêh čar ta rơkâo hơdôm anom bruă khom hơneč mă ayuh hyiăng gêh gal kiăng pơkra “3 tal 4 kíp”; bruă man pơkra khom pơhlôm klă, rơnoh bruă, hơdră, anô̆ hiam hăng anih anom jum dar, ƀu hmâo đul đĭ prăk mă yua ƀu djơ̆ phiăn, pơhlôm klă kơ mơnuih mă bruă hăng pơhlôm kơ mơnuih ƀôn sang, pơgang hlôm hlâo tơlơi ƀu klă, hưp ƀong kông ngăn, prai prăk khưi khai./.