Khua dêh čar ta ơi Phạm Minh Chính pơtŏng sit, Việt Nam lĕ dêh čar ding kơna hmâo bruă gơgrong amăng ngă tui hơdôm bruă pơkôl jar kơmar lăi hrom hăng tơlơi pơkôl jar kơmar kơ ia rơsĭ lăi ha jăn. Kơnuk kơna Việt Nam čang rơmang IMO jing khul jar kơmar ba jơlan hlâo, pơtrut tơlơi gum hrom kơplah wah Việt Nam hăng hơdôm bôh dêh čar ding kơna amăng bruă gum hrom gah ia rơsĭ.

Việt Nam hmâo rơbêh kơ 3.000 km hang ia rơsĭ, dŏng amăng glông ia rơsĭ jar kơmar phun tô dua kual ia rơsĭ prong lĕ Thái Bình Dương hăng Ấn Độ Dương, kual hmâo bruă bơwih ƀong pơđĭ kyar hur har hăng rơnoh đĭ kyar prong. Việt Nam lăng pơđĭ kyar bơwih ƀong gah ia rơsĭ lĕ sa amăng hơdôm tơhnal ba jơlan hlâo amăng bruă pơđĭ kyar bơwih ƀong lŏn ia, ră anai hmâo 34 bôh tơdrun tum păn glăk mă yua. Kiăng kơtưn hloh dong bruă rô nao rai gum hrom amăng bruă ia rơsĭ, jơlan ia rơsĭ, Khua dêh čar ta rơkâo IMO hăng pô Khua čih pioh dŏng yua dong hăng djru Việt Nam pơđĭ tui bôh thâo kơ bruă ia rơsĭ, gum hơgôp sit nik kơ pơđĭ kyar bơwih ƀong – mơnuih mơnam mơng Việt Nam hăng pơtrut rơnuk rơnua, hơđong, gum hrom, pơđĭ kyar ƀơi rŏng lŏn tơnah./.