Tơlơi lăi pơthâo glăi mơng Khua git gai Ping gah tơring čar hăng Jơnum min mơnuih ƀôn sang tơring čar Kontum brơi ƀuh, Kontum hmâo abih bang lŏn ngă đang hmua rơbêh kơ 902.000 ektar, lăp đing nao hmâo giăm truh 170.000 ektar lŏn ngă đang kyâu akă hmâo dlai kyâu. Tơring čar pơsit amăng bruă ngă đang hmua pơđĭ kyar bơwih ƀong phun jrao yơh phun ñu.

Ră anai đơ đam tơring čar hmâo rơbêh kơ 6.800 ektar đang phun jrao, amăng anun lŏn pla sâm Ngọc Linh lĕ rơbêh kơ 1.700 ektar. Lom pơđĭ kyar bruă đang hmua, đang kyâu tơring čar Kontum glăk bưp lu tơlơi gun, kah hăng bruă pơplih bôh than mă yua dlai; akă hmâo tơlơi pơkă kơ apah dlai mă yua hăng dlai pơgang hlôm hlâo pioh pơđĭ kyar bơwih ƀong ƀơi rơgôp tơ-ui kyâu; hơdră bruă djru pơlar đang kyâu akă djơ̆ hăng tơlơi rơkâo hmâo sit...

Tui hăng Khua Ding jum Lê Minh Hoan, hăng hơdôm tơlơi gun bơdjơ̆ nao rơnoh pơkă, tơring čar Kontum hăng Ding jum đang hmua khom ngă tui khop, gir run kiăo tui bĕ lui hĭ ƀah wư rơngiă hĭ tơhnal gal pơđĭ kyar. Khua Ding jum lăi lĕ, Kontum yak blung a hmâo laih jơlan gah nao djơ̆ gah pơđĭ kyar bruă đang hmua, đang kyâu, samơ̆ khom pơƀut mă nua mơng bruă bơwih ƀong hăng nua pơkra pơjing gơnam, sĭ mơdrô, anih anom sĭ. Khua Ding jum ăt pơtŏng sit mơn, Ding jum đang hmua hăng pơđĭ kyar ƀôn lan dêh čar amra gum hrom dong, djru tơring čar Kontum amăng lăi pơthâo, iâu pơthưr, pơtrut tuh pơplai kơ bruă đang hmua mơng tơring čar pơ̆ anăp anai./.