Tơdơi kơ čơkă giong, dua čô khua ding jum pơphun bơkơtuai. Hok mơ-ak khua mua pơ ala Ding jum tơhan pôlih dêh čar Cuba rai čuă sit nik hăng ngă bruă hăng Ding jum kông an Việt Nam, Khua ding jum ơi Tô Lâm lăi, ƀơi anăp bruă hơmâo mơnuih ngă soh, biă ñu lĕ mơnuih ngă soh pơtruh nao rai hăng dêh čar pơkŏn, mơnuih ngă soh gah boh thâo măi mok hăng djŏp tơlơi soh ƀu phiah hơmâo djơ̆ ôh mơng hlâo, jai hrơi phara, tơnap pơgăn, bruă pok prong ngă hrŏm kơplah wah Ding jum kông an Việt Nam hăng Ding jum tơhan pôlih Cuba jai hrơi kiăng biă mă, yua kơ tơlơi rơnuk rơnua mơng rim boh dêh čar.

Ƀơi mông jơnum, dua bơnah tŭ ư: Lăi pơthâo nao rai lu hloh, djru măi mok gơnam yua, pơtŏp brơi tơhan wai pơgang, biă ñu boh thâo pơgang hlâo, hơmâo ƀuh, pơgăn hĭ tơlơi răm ƀăm ngă pirăt...; Pơphun ngă hrŏm pơkra djŏp djuai jrao, gơnam pơkra sinh học, amăng anun hơmâo hơdôm djuai jrao hơmâo kơsem min truh kih laih anun ba pơjrao kơ mơnuih ruă ƀơi dêh čar Cuba...