Anăp nao hơdor glăi 100 thun hrơi pơdŏng pơjing Ping gah cộng sản Việt Nam (3/2/1930-3/2/2030), mơguah lơ 15/1, ƀơi Hà Nội, Anom bruă Ping gah dêh čar ta pơphun ngă lơphet pơphun Rơwang bruă pơplih pơkra, pơkra glăi hăng pơdŏng phrâo Kual Sang jưh tuai Hồ Tây, anai lĕ yak pok phun pioh ngă tui dong bruă pơdŏng Sang djă pioh gru grua Ping gah cộng sản Việt Nam hăng Akô̆ bruă Pơplih mrô amăng hơdôm ƀirô ping gah. Amăng mông ngă lơphet pok phun, Khua git gai Ping gah dêh čar ơi Tô Lâm hrŏm hăng ƀing khua mua git gai Ping gah, Kơnuk kơna hăng ƀôn prong Hà Nội hmâo pok phun laih tơlơi pơtrun pơphun Rơwang bruă.

Rơwang bruă pơplih pơkra, pơkra glăi hăng pơdŏng phrâo Kual Sang jưh tuai Hồ Tây dưi pok phun, pơdŏng tơdơi kơ ngă giong amra jing anih pơphun hơdôm jơlan hơdră, bruă jơnum kơđi čar pơtom hiăp amăng lŏn ia, pơtom hiăp hăng dêh čar tač rơngiao, hơdôm bruă mă yôm phăn mơ̆ng Ping gah, Kơnuk kơna; pơphun jơnum khua pơ ala đơ đam dêh čar mơ̆ng Ping gah; pơphun čơkă hơdôm grŭp jak iâo jar kơmar prong rai čuă mă bruă hăng pơphun hơdôm jơlan hơdră adôh suang phara ha jăn hơdor glăi hrơi ngă lơphet prong mơ̆ng lŏn ia. Anai lĕ ring bruă hmâo bôh tŭ yua kơđi čar prong prin anăp nao čơkă mơ-ak Jơnum Ping gah đơ đam dêh čar tal 14, gum hơgôp amăng tơlơi pơđĭ kyar bơwih ƀong, bôh thâo mơnuih mơnam mơ̆ng plơi prong jưh jom ha rơbâo thun văn hiến, ngă jă dong gru rup, tơlơi kiăng lăi nao mơ̆ng Việt Nam pioh kơ gơyut gơyâu jar kơmar./.