Pơđut hĭ mông jơnum, Khua git gai Ping gah dêh čar ơi Nguyễn Phú Trọng lăi pơtong, bruă ngă tui tơlơi črâo trun mrô 19 hăng tañ ba tơbiă tơlơi črâo ba sa, dua bruă jao akŏ phun hơmâo djru brơi gưl Ping gah, gong gai djop gưl  hmao tlôn prap lui klă hơdôm tơlơi gal kiăng mơnuih ƀon sang čơkă thun phrâo mơ-ak mơ-ai, rơnuk rơnua, pơkrem; pran hur har, mut hrŏm, khăp pap tơdruă, lĕ akŏ phun kiăng ngă pơgiong hơdôm hơnong pơkă, bruă jao thun phrâo 2023.

Lăi nao bruă jao pơ anăp anai, Khua git gai Ping gah dêh čar ơi Nguyễn Phú Trọng pơtă pơtăn, kiăng tŏ tui krăo lăng hlâo tơlơi sit nik, thâo tong ten hơdôm bruă amra ƀuh kiăng hơmâo hơdră pơsir, bong glăi, anăm pơtah tai, ngă amưng ôh. Tơdơi kơ hrơi pơdơi ƀong tết, kiăng đing nao git gai, pơphun ngă tui khut khăt, tŭ yua hơdôm tơlơi pơsit, tơlơi črâo trun, tơlơi klah čun mơng gơnong glông hăng djop gưl. Rĭm anom bruă, gong gai ƀon lan hơmâo akŏ bruă tong ten mơng thun 2023 kiăng pok pơhai brơi lăp djơ̆, gir run ngă pơgiong hơdôm hơnong pơkă, bruă jao thun 2023, anai lĕ thun yôm phăn rơwang thun mă bruă tui Jơnum Ping gah tal XIII.