Đĭ pơhiăp amăng mông jơnum, Khua git gai Ping gah dêh čar ơi Nguyễn Phú Trọng lăng yôm tơlơi gir run mơng khul ling tơhan amăng thun 2022 pơgôp hrŏm hăng Ping gah, abih bang mơnuih ƀon sang hăng anih anom kơđi čar, hơkrŭ glăi bơwih ƀong huă, gir run pơgang, pơgăn hưp ƀong kông ngăn, bruă ngă soh, pơgang rơnuk rơnua, pơtom hiăp hơmâo kơtưn, tơlơi gơgrong, kơdrưh mơng lŏn ia tŏ kơtang tui.

Tơdơi kơ sem lăng tong ten tơlơi sit nik amăng rŏng lŏn tơnah, amăng kual him lăng dŏ lu tơlơi tơnap tap, ƀu hmao thâo, Khua git gai Ping gah dêh čar ơi Nguyễn Phú Trọng rơkâo, pơ anăp anai khul ling tơhan kiăng gơgrong, hơdeč hmar, hrưn đĭ amăng kơsem min, đăo lăng hlâo, ngă tui klă hloh bruă jao djru pơphô bruă brơi Ping gah hăng Kơnuk kơna kơ bruă ling tơhan, wai pơgang rơnuk rơnua; hơmâo hơdră pơsir lăp djơ̆, tŭ yua hơdôm bruă tơnap, anăm sư̆ rơbư̆ tơdah hơmâo bruă hơget thơ. Đing nao pơphô bruă, pơsir hĭ hơdeč hmar, lăp djơ̆ ba glăi tŭ yua tui tơlơi rô nao rai amăng jar kmar; hơdôm hơdră pơgang, pơgăn hŭi kơ hơmâo rung răng kơsung blah tañ hloh, mơng ataih; bruă ƀơi guai lŏn ia, kual ia rơsĭ. Hrŏm hăng anun, tŏ tui hluh rơđah hăng hruă kjăp ƀiă dong bruă ngă tui tơlơi črâo trun amăng wai pơgang lŏn ia amăng abih bang mơnuih, djru wai pơgang hơđong amăng rơnuk phrâo anai.