Tlam lơ 21/2 ƀơi Ƀirô Ping gah, Khua git gai Ping gah dêh čar ơi Nguyễn Phú Trọng hơmâo mông tŭ jum khua mua pơprong Ping gah tui hơdră gah ieo pơlir hơbit (MIU), yua Khua git gai Ping gah Mi-ghen Mê-hi-a, Khua ding jum hơdră bruă mut hrŏm amăng kual dêh čar Dominica, ba jơlan hlâo nao čuă hăng mă bruă ƀơi Việt Nam, dong mơng lơ 18/2 truh lơ 26/2/2023. Amăng mông bưp, Khua git gai Ping gah dêh čar ơi Nguyễn Phú Trọng  pơsit tong Ping gah, Kơnuk kơna Việt Nam lêng kơ lăng yôm tơlơi rô nao rai giang mah, ngă hrŏm djop mơta hăng hơdôm boh dêh čar, djop Ping gah tui gru grua hiam klă, amăng anun hơmâo dêh čar Dominica hăng Ping gah MIU.

Khua git gai Ping gah ơi Nguyễn Phú Trọng hok mơ-ak hăng tơlơi ngă hrŏm kjăp hăng jai hrơi tŭ yua kơplah wah Ping gah Cộng sản Việt Nam hăng Ping gah MIU laih dong hơdôm Ping gah akŏ phun pơkŏn ƀơi dêh čar Dominica. Khua git gai Ping gah rơkâo dua bơnah tŏ tui gum hrŏm kjăp, pok pơhai tŭ yua hơdôm akŏ bruă ngă hrŏm kơplah wah dua Ping gah. Khua git gai Ping gah Mi-ghen Mê-hi-a lăi pơtong kiăng dua bơnah pok prong hăng ngă dơlăm tui amăng djop mơta bruă ngă hrŏm mơng dua boh dêh čar.