Mơguah lơ 9/1, ƀơi ƀôn prong Hồ Chí Minh, ƀrô bơyan prap čơkă thun phrâo tui phiăn juăt Ất Tỵ 2025, anăp nao 95 thun hrơi akŏ pơjing Ping gah Cộng sản Việt Nam (3/2/1930-3/2/2025), Khua git gai Ping gah dêh čar ơi Tô Lâm hơmâo nao pơbưp hăng git gai mông bưp ƀô̆ mơta ƀing khua mua Ping gah, kơnuk kơna, ƀing apăn bruă ba gru, ƀing rơgơi kơhnâo, ƀing čih boh pia, adôh suang ƀơi hơdôm boh tơring čar, ƀôn prong kual Dơnung. Amăng mông bưp, Khua git gai Ping gah dêh čar ơi Tô Lâm pơsit tong, amăng hơdôm mông jơnum rơgao, Ping gah hơmâo tŭ ư hrŏm kơ bruă pơsit tong tơlơi pơmĭn rơđah kơ rơnuk pơplih phrâo, rơnuk hrưn đĭ pơdrong asah mơng djuai ania, anai lĕ rơnuk pơđĭ kyar, rơnuk prong kơtang, rơnuk pơdrong asah tui tơlơi git gai mơng Ping gah Cộng sản. Hrơi mông pok pơphun rơnuk pơplih phrâo lĕ Jơnum Ping gah tal XIV hăng kiăng ngă tui hơdôm jơlan gah, hơnong pơkă yôm phun anai, Ping gah Ding jum kơđi čar, khul git gai Ping gah, Khua pơ ala mơnuih ƀôn sang dêh čar, Kơnuk kơna hơmâo ba tơbiă lu tơlơi črâo trun, hơdră bruă yôm phăn.

Khua git gai Ping gah brơi thâo, Ping gah, Kơnuk kơna lêng pơsit tong bruă pơđĭ kyar tañ samơ̆ kiăng hơđong kjăp kiăng pơjing atur boh thâo phrâo, boh thâo măi măi, tơlơi pơplih mrô hăng sit biă ñu lăng ană mơnuih lĕ phun, đing nao pơđĭ kyar mơnuih mă bruă thâo rơgơi. Tŏ tui pơsur anom bơwih ƀong sĭ mơdrô tuh pơ alin amăng bruă kơsem min hăng pơđĭ kyar, sit biă ñu lĕ amăng hơdôm bruă boh thâo phrâo hăng boh thâo sinh học; ngă gêh gal brơi anom bơwih ƀong sĭ mơdrô pơphun bơwih ƀong, pơplih pơčeh phrâo hăng pơjing rai rơnoh bơwih ƀong phrâo. Khua git gai Ping gah dêh čar sa wŏt dong čang rơmang tŏ tui hơmâo tơlơi dong yua, gum pơgôp yôm phăn mơng ƀing khua mua, ƀing rơgơi kơhnâo, ƀing čih boh pia, tơlơi adôh suang-ƀing mơnuih lêng ngă lar hyu pran pơsur hăng pơtrut pran jua prong prin amăng jơlan pơđĭ kyar lŏn ia ta.