Khua git gai Ping gah dêh čar ơi Tô Lâm brơi thâo, thun 2024,  15 hơnong pơkă đing nao pơđĭ kyar bơwih ƀong huă-mơnuih mơnam amăng dêh čar lêng kơ dưi ngă hăng rơgao tơlơi pơkă; amăng anun GDP đĭ rơbêh 7%, pok prong bơwih ƀong huă giăm 500 klai đôlar Mi, pơhrui ngăn drăp giăm 2 klăk klai prăk. Amăng hơdôm tơlơi dưi hrŏm amăng lŏn ia, hơmâo tơlơi gum pơgôp yôm phăn mơng tơhan kông ang, khua mua Ping gah, kơnuk kơna, khua mua hơđăp tơhan kông ang, ƀing khua mua kông ang pơdơi lơtret.

Khua git gai Ping gah lăi pơtong, thun Ất Tỵ 2025 yôm phăn biă mă, tơhan kông ang kiăng tŏ tui ba gru ngă tui hơdôm tơlơi črâo trun mơng Ping gah, čang rơmang ƀing khua mua hơđăp, tơhan kông ang mơnuih ƀon sang amăng djop rơnuk pơdah pran gơgrong, ba gru ƀơi anih dŏ hơdip, gum tơngan hrŏm, ngă tui klă hloh djop tơlơi gal kiăng pơjing, pơđĭ kyar hăng wai pơgang lŏn ia.