Mơguah tom brơi (4/2) ƀơi Ƀirô Ping gah, Khua git gai Ping gah dêh čar ơi Tô Lâm git gai jơnum Khul git gai Ping gah, lăng glăi bruă pok pơhai ngă tui tơlơi črâo trun mrô 40 mơng Khul git gai Ping gah kơ bruă pơphun tết Ất Tỵ thun 2025; git gai sa, dua bruă jao akŏ phun mơng gơnong glông, djop gưl Ping gah pơ anăp anai. Pơhiăp pơđut mông jơnum, Khua git gai Ping gah dêh čar ơi Tô Lâm pơpŭ bơni, lăng yôm djop gưl, gơnong bruă, anom bruă, sang bruă, gong gai ƀon lan hơmâo hruă kjăp, pok pơhai ngă tui khut khăt, tŭ yua tơlơi črâo trun mrô 40 kơ bruă pơphun Tết tui phiăn juăt Ất Tỵ thun 2025.

Kơ hơdôm bruă jao akŏ phun pơ anăp anai, tŭ ư hăng 09 grup bruă jao hơmâo ba tơbiă, Khua git gai Ping gah dêh čar lăi pơtong tơlơi rơkâo mơng hơdôm anom bruă, sang bruă, gong gai pơphun bruă mă mơtăm tơdơi kơ hơdôm hrơi pơdơi Tết, anăm brơi ƀong tết sui đơi, pơtah hơtai amăng bruă mă, đing nao pơgiong djơ̆ hrơi mông bruă mă amăng blan 2/2025 hăng rơwang tal I/2025; pơphun hơdôm hrơi ngă yang akŏ thun pơphun rơnuk rơnua, pơkrem, pơsir hĭ khut khăt hơdôm bruă ngă soh. Prap lui klă hơdôm boh tơhnal brơi Jơnum Khua pơ ala mơnuih ƀôn sang dêh čar blan 2/2025, sit biă ñu lĕ hơdôm boh tơhnal bơdjơ̆ nao bruă dưm dăp anih anom mă bruă hăng pơsir hĭ tơnap tap, gun găn kơ hơdră bruă. Gir run ngă tui khut khăt hơdôm hơdră bruă, ngă tui hơnong pơkă đĭ GDP rơbêh 8% thun 2025, pơtrut pơđĭ kyar 2 mrô amăng rơwang thun 2026-2030.