Đĭ pơhiăp amăng mông jơnum, Khua git gai Ping gah dêh čar ơi Tô Lâm lăi pơtong, amăng hrơi mông mut hrŏm tar ƀar rŏng lŏn tơnah hăng pơplih tuh tia pơkra tal pă, boh thâo phrâo hơmâo yua hăng glăk pơsit tong tơlơi gơgrong phun, pơtrut pơđĭ kyar bơwih ƀong huă hăng mơnuih mơnam. Pơplih yua boh thâo phrâo ƀu djơ̆ kơnong lĕ jơlan gah kiăng ngă tui đôč ôh mơ̆ ăt lĕ tơlơi rơkâo ječ kiăng Việt Nam rĭ giăm amăng pơđĭ kyar amăng kual hăng jar kmar. Laih dong, pơplih yua boh thâo phrâo pơhlôm brơi sui thun, djru kơtang amăng bơkơtưn dêh čar hăng hơkrŭ kơdrưh ang mơng Việt Nam amăng tơlơi bơwih ƀong huă rŏng lŏn tơnah. Samơ̆, kiăng kơ dưi ngă tui hơdôm hơnong pơkă anai, kiăng ƀuăn kơtang mơng Kơnuk kơna, tơlơi gum hrŏm mơng anom bơwih ƀong sĭ mơdrô, tơlơi mut hrŏm mơng mơnuih mă bruă hăng abih bang mơnuih ƀôn sang.

Khua git gai Ping gah rơkâo, hrưn đĭ tơlơi thâo thăi hăng pran bơkơtưn amăng rŏng lŏn tơnah, gir run truh thun 2030, ba Việt Nam dong amăng top 3 boh dêh čar ba jơlan hlâo amăng kual Ngŏ dơnung Asia amăng kơsem min hăng pơđĭ kyar yua boh thâo phrâo, akŏ pơjing rai ƀiă biă mă ñu 5 boh anom bơwih ƀong sĭ mơdrô yua boh thâo phrâo dưi bơkơtưn kơtang amăng jar kmar.