Tŭ jum yă Trần Thị Lâm, khua gum bruă Sang bruă Shangri – La Healthcare Invesment, Khua git gai Ping gah dêh čar ơi Tô Lâm bơni anom bơwih ƀong tuh pơplai kơ bruă ia jrao, rơkâo pơtrut tañ rơnoh hơdôm rơwang bruă glăk ngă tui, tuh pơplai dong, biă ñu hơdôm bruă hmâo mrô bruă măi mok lu, klă hăng lŏn mơnai. Khua git gai Ping gah dêh čar ta brơi thâo, Việt Nam amra ngă gal brơi dong kơ mơnuih tuh pơplai, hrŏm hăng anun rơkâo hơdôm bôh ƀirô apăn bruă, gong gai tơring čar, ƀôn prong gum hrŏm hăng pô tuh pơplai pioh pơtrut bruă pok pơhai rơwang bruă.

Tŭ jum Lim Boon Heng, Khua Grŭp Temasek, Khua git gai Ping gah dêh čar ơi Tô Lâm lăi rơđah tơlơi đing nao mơ̆ng Việt Nam amăng pơđĭ kyar bơwih ƀong mơnuih ƀôn sang, brơi thâo Việt Nam ăt lăi pơthâo laih mơn hơdôm mơta bruă pơđĭ kyar bơwih ƀong, khom hmâo măi mok phrâo, mơnuih mă bruă thâo, hăng ngăn rơnoh mơ̆ng dêh čar tač rơngiao, yua anun hơdôm Keh prăk tuh pơplai jing kiăng biă. Amăng tơlơi ră anai, Việt Nam ăt hmâo bơkơtuai mơn hơdôm tơlơi pơkôl sĭ mơdrô mơ-ak, lăi pơthâo nao rai hăng hơdôm bơnah gum hrŏm pioh pơsir hơdôm tơlơi sĭ mơdrô gơnam tam, pơhlôm anih anom tuh pơplai gêh gal kơ hơdôm mơnuih tuh pơplai, amăng anun hmâo ƀing tuh pơplai mơ̆ng Singapore./.